Shah khot hajir u trai ka 7trep TV, ba ujor ka SKRS Ri Bhoi

Hadien ka jingtrei shitom ki bor pulit ban wat ïa u trai jong ka YouTube Chanel “7Trep TV” kaba la thad pynjah burom ïa u bah BB Makdoh Chairman ka Synjuk ki Rangbah Shnong Ri Bhoi da kaba pynmih ïa ka khubor thok bad pyrshang ban ïalam bakla ïa ki paidbah, ki pulit ka Ribhoi hynnin janmiet ki la lap ïa u trai jong katei ka Chanel lem bad ïa u paralok jong u, uba la donkti lang ha katei ka kam. Katei ka jingioh ban bat noh da ki pulit ïa kitei ki ar ngut ka long hadien ba u Bah BB Makdoh Chairman ka Synjuk ki Rangbah Shnong Ri bhoi ha ryngkat ka jingsynran lang kiwei ki Rangbah Shnong hynnin ka sngi ki la leit ban buh da ka ujor Ejehar ha Nongpoh Police station pyrshah ïa katei ka YouTube Chanel kaba kyrteng 7trep TV ba dang ha kine ki khyndiat sngi ka la pynmih kawei ka khubor kaba uwei u Rangbah ba khlem pynpaw kyrteng u la kynthoh pyrshah ïa u Pynïaid Sing Syiem, da kaba pynmih ruh da ka dur jong u Bah BB Makdoh.

Kitei ki arngut kiba donkti haka jingpyn saphriang ïaka khubor lamer la tip kum u samla Fernando Diengdoh, u trai jong ka YouTube channel “7Trep TV” Uba la pynmih ïa katei ka khubor bad u ba shong ba sah ha Kynshi bad u samla Neverson Marbaniang ba pule ïa katei ka khubor “Voice Over” ba shong ba sah haka Shnong Erpakon, Ribhoi District.U Bah BB Makdoh, u la ïathuh ba tang hadien 3 kynta ba ki la wan ban ujor Ejehar pyrshah ïa katei ka YouTube channel ha Police station Nongpoh, naka liang ki bor pulit ki la lap noh ia kitei ki arngut kiba la Donkti ha katei ka kam ban pyn saphriang ïaki khubor lamler, bad u la ai khublei ïaka Police Department ba ki la long kloi ban shimkhia ïa kane ka kam.

Shuh shuh u la ïathuh ba kum ki nongialam jong ki Shnong bapher bapher kim shem la Don kano kano ka daw bad kitei ki arngut ki samla bad u la ong ruh ba ki long kloi ban ïa map hynrei kitei ki arngut kin hap ban wan mih biang ha Nongpoh Police station lashai ka sngi ha ryngkat bad ki Kmie ki kpa lane bahaïing, khnang ba ki bahaïing jong ki ruh kin tip ïa kaei kaba ki khun jong ki la leh. Shuh shuh u bah BB Makdoh u la maham ruh ïa kitei ki arngut bad kumjuh ïa kiwei kiwei ki YouTube channel ba kim dei ban pynmih kum kine ki khubor thok ki khubor lam ler kaba lah ban ktah ïaka long rynnieng jong u briew bad ïalam bakla ruh ïa ki paidbah.