Shah ktah 7 tylli ki shnong ha ka thaiñ langpih na ka ‘Erlangthari

Haduh hynñiew tylli ki shnong hapoh ka thaiñ Langpih, ki la shah ktah ha ka jingkhie kyndit jong ka eriong ryngkat u slap bajur kaba la pynjulor palat 44 tylli ki longiing hapoh ki san tylli ki shnong kiba don hapoh ka thaiñ Langpih. Katei ka jingjia khie kynsan jong ka eriong bad u slap ka la jia ha ka miet sngi u Blei ha ka por kumba 7:00 baje ei ei.

Kitei ki iing kiba la shah pynjulor ha ka jing wan lyngshop jong ka eriong ki kynthup palat 20 tylli ha ka shnong Umyiap bad 5 ngut kiba mynsaw, 15 tylli ha ka shnong Tynghor, 7 tylli ha Langpih, 2 tylli ha iew Nongma, bad katto katne tylli ha Umwali, Umbyrsit bad Mawdiangsnam. Nalor kine dang don shuh shuh sa kiwei pat ki shnong ba marjan kiba la shah ktah hynrei ym pat shym la ioh jingkhein haduh mynta.

Ki nongialam shnong katei ka thain ki la iathuh ba na ka liang jong u BDO ka Mawshynrut u ka bthah ia ki sordar shnong ba kin phah jingtip bad ai jingkhein ia ki longiing kiba lashah ktah ha katei ka jingjia khnang ba ka sorkar kan lah ban pynioh ia ki lad jingiarap ba kyrkieh.