Ka jingther u lapbah, ka eriong bad u phria hynne ka sngi kila pynjulor ia 135 tylli ki iing kiba don ha West Khasi Hills, Eastern West Khasi Hills bad ha East Khasi Hills District. Ka Secretary jongka tnad Revenue & Disaster Management, ka Kong Matsiewdor War Nongbri kala iathuh, ba 6 tylli ki shnong kiba don ha ka Eastern West Khasi Hills District kila shah ktah na ka jingwan lynshop ka eriong bad u phria, ha kaba 62 tylli ki iing kila shah pynjulor ha ka bor mariang. Ka Kong Matsiewdor War Nongbri kala ong, ba kitei ki shnong kiba la shah ktah ki kynthup ia ka shnong Nongkhlaw, Mawiongkhri, Nongthyllep, Mawnai, Umshyiap, Phudbah bad ka Demdngiem bad ka bor mariang kala pynjulor ia ki 62 tylli ki iing bad ki jingthung jingtep ha ka jaka kaba don hapoh ka 50 Hektar bad na kane ka jingwan lynshop ka bor mariang kala ktah ruh ia ki 172 ngut ki nongshong shnong.
Kala iathuh ba ka Eriong kala pynjulor ruh ha Nongstoin, West Khasi Hills ha ka por 9:30 mynstep ha ka shnong Malangkhasi, Malangkona Circle bad ha kane ka jingjia 5 ngut kila shah ktah kiba kynthup ia ki 2 ngut kiba la heh bad 3 ngut kiba dang rit. Ka eriong ryngkat bad u phria kila ktah ruh ia ki 52 tylli ki iing kiba don ha ka Nongstoin Circle ha kaba 135 ngut kila shah ktah ha Mawlieh Circle, 45 ngut ha Byrki Circle, 15 ngut ha Mawthir Circle, 15 ngut ha Mawlangsu Circle bad 40 ngut ha Mawdoh Circle.
Ka Kong Matsiewdor kala pyntip ba ka Eriong kala pynjulor ruh ia ki 21 tylli ki iing ha ka shnong Mawlynrei kaba hap ha ka Mawryngkneng Block jong ka East Khasi Hills District. Kane ka heh ophisar sorkar kala iathuh ruh ba ki DC bad ki DDMO ki dang trei ia ka kam na ka bynta ban pynbiang ia ka jaka sah na ka bynta ki lanot kiba la shah pynjulor ia ka iing ka sem ka jongki.
