Ka Public Hearing ne jingpynsngew paidbah hynne ka sngi halor ban pynieng kharkhana pynmih dewbilat thymmai ha shnong Wahïajer Narpuh kaba tip kum ka Megahtop Private Cement Limited, ka long kaba iaid beit iaid ryntih namar baroh kiba ai jingkren kila ai ka jingkyrshan ba pura ban shna ia kane ka kharkhana kumjuh ruh ki paidbah nongshong shnong. Katba ki sengbhalang bapher bapher pat ba kynthup naduh ka KSU, HITO, FKJGP bad kiwei kiba thmu leit tur sha katei ka jaka pynlong public hearing naka bynta ban pynsngew iaka nongrim jingpyrshah, kila shah pakhang lynti noh haki volunteer jong ka shnong kiba la iamih ryntih ban peitngor bad talasi iaki briew ba wan sha katei ka jaka pynlong public hearing.
Katkum ki vedio bala iohring dur ka jingiakren hapdeng ki sengbhalang bad ki volunteer shnong, la sakhi ba ki sengbhalang kila kyrpad iaki ban ailad ba kin leit pynsngewthuh iaka nongrim jong ki namar ba kane dei ka public hearing. Ki ong ruh ba ka jingwan jong ki kam mut ba ki thmu ban thaw kano kano ka jingkulmar, kumta naka liang ki volunteer ki jubab ba ki ailad ban rung tang uba thmu ai jingkren bad uwei ban synran ia u, namar lada ailad ban rung lut baroh tikna kan mih jingkulmar. Ia kane ka public hearing la pynlong daka Meghalaya State Pollution Control Board (MSPCB), haka jingialang ba pyniaid da u G.
Warjri Additional Deputy Commissioner East Jaiñtia Hills District ryngkat ka jingdonlang ki dkhot ka Meghalaya State Pollution Control Board, kynthup u Dr. GW Chyrmang, u Frankie Laloo. Kiba ai jingkren ha kane ka sngi naduh ki nongshong shnong ka Wahiajer Narpuh kumjuh ki khlieh nongshynshar shnong bad Elaka Narpuh ki ai ka jingkyrshan.
