Ka ophis treikam ka tnat Divisional Forest Officer (DFO) Jaiñtia Hills (Wildlife Division) hynne ka sngi kala pynkut iaka taiew lehkmen ‘Wildlife Week’ ha ka jingialang bala pynlong ha hall ka dorbar shnong Tpep Pale Jowai. Ha kane ka sngi pynkut ka tnat Wildlife kala pynkup burom ruh daka ‘Wildlife Samaritan Award’ ia 18 ngut ki riew shimet kumjuh 4 tylli ki kynhun kiba na West Jaintia bad East Jaintia Hills District halor ka jingdon bynta jong ki ban pyllait im iaki mrad bapher bapher. La donlang ha kane ka sngi u SM. Sahai IFS Principal Chief Conservator of Forest (Wildlife), Shillong kum u kongsan, ka DV. Lyngdoh ADC West Jaintia Hills District, u PK. Agrahari, IFS Chief Conservator of Forests (Wildlife), Shillong, u P. Khade IFS, Assistant Conservator of Forest Jaintia Hills Territorial Division, Jowai, ka N Laloo, IFS, Divisional Forest Officer, Jowai.
U SM. Sahai IFS Principal Chief Conservator of Forest (Wildlife), Shillong, haba kren kum u kongsan u yaroh iaka Jylla Meghalaya kaba don iaki shnong ki thaw ba shimkhia ban pynneh pynsah iaki khlaw ki btap naduh ki por mynbarim, ba kane ka dei ruh shi bynta ban pynneh pynsah iaki mrad khlaw bad jingthaw ba im haka naduh kiba rit eh haduh kiba heh. U ong ba ka Jylla Meghalaya kala long ruh kaba ar haka Ri kaba don iaki khlaw ba la ai jingiada kyrpang bad shen kan sa wan ba nyngkong.
Kumta u kyntu ka jingiatreilang jong uwei pa uwei ban don ka jingkitkhlieh naka bynta ban ai jingiada iaki khlaw ki btap kumjuh ki mrad, bad ong ruh lada leh kano kano kaba buh jingma iaka mariang kaba khatduh dei ka jingma ia u briew hi. Shwa kane ka sngi naka liang ka tnat Wildlife kala pynlong ruh daki jingiakop bapher bapher kum ka jingthoh essay, drawing bad extempore speech kiba don jingiadei halor ka jingdonkam ban pynneh pynsah bad ai jingiada iaki mrad khlaw.
