U Myntri Rangbah ka jylla u Conrad K Sangma, ula pynkup burom ia u Elambok Dkhar halor ka kam shlur jong u, ban pyllait im ia kawei ka khynnah kynthei kaba la jan ngam jyllop. U Elambok u dei u khynnah khunswet marwei ba dang 13 snem ka rta na ka shnong Wahsiej, South West Khasi Hills. Hadien ba la khlad ka kmie bad u kpa, u Elambok u sah bad i khaduh jong u, i kong Ridamon Skhemlon ha shnong Wahsiej, kaba jngai kumba 7km eiei na Mawkyrwat. U Elambok u dang leit klas VII ha Christian Principle Academy, Mawkyrwat.
Katkum ka jingiathuh i khaduh jong u Elambok, la iathuh ba ha ka 21 tarik Iaiong, 2024, ar ngut ki briew kila ngam jyllop ha wah Rilang, Wahsiej bad kawei pat la ioh ban pyllait im noh da u Elambok uba la iarap khlem jingtieng ban pyllait im ia ka.Ha ka syrnod ba la pynkup burom ia u, u Myntri Rangbah u la ong ba ka jingshlur jong u Elambok ka la pyllait ia ka jingim ba kordor na ka jingiap jong ka thei samla, bad ai ba kane ka jingshlur jongu, kan long ka nuksa ia kiwei ruh kumjuh.
Ia kane ka jingpynkup burom la pyllong ha iing sah u Myntri Rangbah ha Shillong, ha kaba la don lang ki kmie kpa jong une u khynnah bad kiba ha iing nalor kiwei pat. Na ka Liang u Myntri Rangbah ula pyntikna ha kiba haiing ba lada don kano kano ka jingeh khamtam ha kaba iadei ka jingpule jong u, ba kin pynsngew khnang ba un thaw lad ban iarap ia une u khynnah riew shlur.
