Ka khyrdop ILP ban talasi bar jylla jong ka Khasi Student Union ha ka shnong 20 Mer Pahammawleiñ ban talasi ïa ki kot ki sla jong ki bar jylla kiba thmu ban rung shapoh ka jylla hynne ka step jong ka 9 tarik Naitung ka la shah thang bad shah pynpra bad na ka liang ki nongïalam jong ka KSU ki la kynnoh ba ïa katei ka jingthang ïa ki flex bad pynpra ïa ka khyrdop la leh da ki bor pulit.
Ïa katei ka Khyrdop ka KSU ka la pynïeng ha ka 6 tarik Naitung ha ka shnong 20 mer Pahammawleiñ ban khynra naphang ïa ki kali kamai kiba kit ïa ki bar jylla bad ban talasi ïa ki kot ki sla, na ka liang ki nongïalam ka KSU ha katei ka sngi ki la ïathuh ba ki la don da ki spah ngut tam ki bym shym la don ïa ki kot ki sla ba biang bad ki la pynphai noh ïa ki na ka jaka ba ki wan.
Katkum ka jingïathuh ki nongïalam ka KSU ha ka 6 tarik Naitung ki la ïathuh ka daw ba la pynlong ïa ka seng ban pynïeng ïa katei ka Khyrdop ka dei halor ka jingleh kuman ka Sorkar pdeng ban ai noh ïa ka Inner Line Permit (ILP) bad ka jingpynslem ka Sorkar jylla ban pyntreikam noh ia ka Meghalaya Resident Security and Safety Act (MRSSA) ka la pynlong ia ka KSU ban pynïeng syndon ïa ka katei ka Khyrdop bad ban khynra naphang ïa ki mynder ri kiba thmu ban wan hapoh ka jylla khlem ki kot ki sla kiba biang.
