Kawei ka longkmie ba la tip kyrteng ka kong Rilinda Symbei 24 snem ka la shah rong ha ka umsaw hynne ka step ka 2 tarik Nailur, 2024 katba ka dang leit saitjain ryngkat bad 3 ngut ki paralok hynrei kitei paralok ki la lait salit na katei ka jingjia shah rong umsaw.
Katkum ka khubor na ki pulit la iathuh, ba katei ka longkmie ryngkat lai ngut ki parallok ki dang leit saitjain hapoh wah Phodkynthei kumba 3 KM na Nongstoin bad ha katei ka por la wan hap u lapbah ba jur bha. Kumta, haba iohi ba ka um ka la sdang ban kiew stet, kitei ki briew ki la pyrshang ban mih noh na katei ka jaka ba kam noh sharud wah, hynrei kumno re kumno ka umsaw ka la ioh ban rong noh ia ka kong Rilinda Symbei, katba lai ngut kiwei pat ki la lait im na katei ka jingjia.
Hadien ki la pyntip ia katei ka jingjia ha ki pulit bad na ka liang ki pulit ka tnad Fire and Emergency Service ryngkat ki ophisar na Nongstoin police station ki la hiar sha katei ka jaka bad dei ha ka por kumba 4:30 PM ei ei ba ki la ioh ban sei noh ia ka met jong katei ka longkmie narud wah kaba la sahkut ha ki jaka maw bad ia ka met la rah noh sha Civil Hospital Nongstoin na ka bynta ban pyndep ia ki jingdonkam baroh.
