Shah siat iap 1, mynsaw 3 ngut ki BSF ha thain Shella

Ki Shipai iada khappud Border Security Force (BSF) kila pyntip ba ha ka miet jong ka 01 tarik mynta u bnai, 3 ngut ki BSF kila mynsaw na ka jingshah thombor ha ki runar kiba donkti ha ka kam khaïï be-aiñ sha ka ri Bangladesh. Ka kyrwoh naka BSF ka kdew ba kane kala pynlong iaki ban siat kum shi bynta ban beh ia kitei ki runar kiba na Ri India bad Bangladesh. La iathuh ba ki shipai BSF ki dang pynlong ia ka jingkhynra ha khappud, kila sakhi ia ki runar kiba la rah ia ka shini bad u piat ban khaïï be-aiñ sha Bangladesh ia kaba la wan ban shim da bun ngut ki nong Bangladesh, kumta kila ialeh ban pynsangeh ia katei ka kam khaïï be-aiñ hynrei kitei ki runar kim shym la treh ban sangeh.

Ki BSF kila pyntip, ba kila iai bteng ban ai ka jingmaham hynrei kine ki runar kibala don bun ngut kim shym la sngap satia hynrie kila leit tur sha ki BSF bad pyrshang ruh ban knieh ia ki tiar siat jongki, kumta ki BSF kila siat shi kuli sha suiñ ban pynpra ia kine ki runar hynrei kim shym la kynran dien satia hynrei kila pyrshang ban thombor bad ki BSF kila siat biang ha kaba kitei ki runar kila phet krad noh. Ki BSF kila iathuh ba kila ioh jingtip hadien ba uwei u nongkhaïï be-aiñ ula ïap ha katei ka jingjia bad uwei u nongkhaïï ka ri Bangladesh ula mynsaw.

Ha kane ka jingjia, uwei u nongshong shnong ha ka shnong Shella kaba don ha ka khappud bad ka ri Bangladesh ula shah siat ïap ha ki shipai Border Security Force ha ka miet jong ka Sngi Thohdieng.Lathuh ba une uba la khlad noh na ka jingshah siat iap la tip kyrteng kum u Arsen M Marak bad mynta ki dang leh ia ka Post Mortem ia ka met. Kila iathuh ba katei ka thaiñ kadei kaba jur bha ka jingkhaïï be-aiñ ia ki masi, shini, piat, kyiad bad kiwei kiwei ki jingdih pynbuaid sha ri Bangladesh bad kane ka jingjur jong ka jingkhaïï be-aiñ kala ktah ruh iaka shongsuk shongsahngaiñ ha katei ka thaiñ khappud tang na ka bynta ka jingmyntoi jong ki riewshimet.