Shah sloit jinglong MP ka Mahua Moitra na ka jingkynnoh bam pisa

Ka MP jong ka Trinamool Congress ka Mahua Moitra hynne ka sngi ka shah sloit ia ka jinglong dkhot ha iing dorbar Lok Sabha halor ka jingkynnoh bam pisa.

Ka iing dorbar Lok Sabha ka la mynjur ia ka resolution ban weng dkhot ia Mahua Moitra kaba la pynshong nongrim katkum ka kaiphot jong ka Ethics Committee la ujor ba ka shim pisa.

Ia ka resolution ban weng dkhot ia ka Moitra la wanrah da u Myntri Parliamentary Affairs ka sorkar pdeng u Prahlad Joshi halor ki nongrim ba la lap da ka Committee.

Ia ka resolution la mynjur da ka ‘voice vote’, hadien ba la shah weng katei ka dkhot liang pyrshah ka mih na ka iing dorbar Lok Sabha.

Kham shwa u Lamphang ka iing dorbar u Om Birla ym shym la shah ia ka Mahua Moitra ban kren ha ka iing halor ka Ethics Committee da kaba ong, “kan sa ioh lad ban iakren ha ka rynsan ia tainia”.

“Ka Ethics Committee kam donbor. Kane ka dei ka jingsdang ban kut ka BJP,” la ong ka Mahua Moitra haba kren shabar ka iing.

“Ka Ethics Committee ka lap bad pynshong nongrim ia ka jingthoh jong ki ar ngut kaba bym shai bad kyllain iwei ia iwei halor ka jingiateh kular ” ka la bynrap.

Ha ka 6 tarik Risaw, ka Ethics Committee jong ka Lok Sabha ka la ai bor ban weng dkhot ha ka iing ia ka MP jong ka TMC halor ka jingkynnoh ba ka shim pisa.

Ha kajuh ka por, ka liang ka BJP ka la kam ba ka Mahua Moitra ka la iaid lait ia ka national security da kaba ai ia ka password  jong ka bad u Hiranandani.

Kumta ka Mahua Moitra ka la shah kynnoh haba wanrah jingkylli ha iing dorbar Lok Sabha pyrshah ia u Gautam Adani kaba long kum ka jingbtah u Darshan Hiranandani u nongkhaii heh spah.

Halor kane ka MP jong ka TMC MP ka kyntait ia ka jingkynnoh ba ka don ka jingshim pisa hynrei ka la kubur ba ka al ai ia ki jingtip ba bniah shaphang ‘parliamentary’ bad u Hiranandani.