Ka Puron kaba la kylla long ka MP Lok Sabha jong ka seng BJP ka Kangana Ranaut ka la shah sneng shah hikai skul ha ki nongïalam ka seng hadien ba ka jingkren kyntoh laplah khlem pyrkhat halor ka sian hima sima shaphang ki jingïakhih jong ki nongrep kaba la pynkih ki jingkynad kiba jur hapdeng ki nongkyrshan bad nongïalam ka seng. Ka jingpynshai ka la don ryngkat bad ka jingsneng jinghikai skul ïa ka – ki jingkren jong ka Kangana Ranaut kim dei satia ïa ki jingmut jong ka party, ka dei ka jingmut jongka shimet, la ong ka BJP hynnin ka sngi. Kane ka jingbym mynjur jong ka BJP ïa ki jingkynthoh jong ka MP ka seng, ka la wan shisngi hadien ba kane ka MP jong ka seng ba 38 snem ka rta u la kren bad ai jingmut ba ka jingïakhih jong ki nongrep ka lah ban wanrah ïa ka jingeh kaba khraw kum ka jingjia ha Bangladesh kaba lah ban wan jia ha India lada ym dei ban shim ïa ka sienjam ba tyngeh da ka sorkar halor ki jingeh ki nongrep. “Ka Kangana kam don bor ban kren halor ki kam Policy na ka bynta ka party bad ym shym la ai jingbit ïa ka ban leh ia kane. Ka BJP ka la bthah ia ka Ranaut ban kiar na kaba kren ia kum kine ki jingkren hadien habud khlem da tip ïa ki policy jong ka sorkar Kmie,” la ong ka kyrwoh na ka BJP.
Shwa ia kane, ki nongialam ka BJP na Haryana bad Punjab ki la ai jingmut ruh ia katei ka MP kaba mihkhmat na Mandi jong ka Himachal Pradesh sha Lok Sabha ba kan kiar na kaba pynmih ia ki jingkren shimet kiba pynsngewsih pynbitar. “Kam dei ka tnad ba donbor jong ka Kangana ban kren halor ki policy ka sorkar Pdeng jong ki nongrep, ka jingkren jong ka Kangana ka dei ka jingkren shimet. U PM Modi bad ka BJP ki dei kiba iadei bad ki nongrep. Ki seng Pyrshah ki trei pyrshah ia ngi bad ka jingkren jong ka Kangana ruh ka leh kumjuh. Kam dei ban kren ia kum kine ki jingkren, halor ki sensitive lane ki mat niam, ki seng niam,” la ong u nongialam ka BJP na Punjab, u Harjit Grewal. Ka jingkren jong ka, ka la ioh ruh ia ka jingkynthoh na ka seng Congress ha kaba u nongialam u Randeep Surjewala u la kyrpad ia u nongialam ka BJP ban “koit noh kloi”. U Surjewalal, uba dang ialap elekshon ha Haryana, kaba la sakhi ia ka jingiakhih jong ki nongrep, kaba la dap shisnem, u la kylli, “Hato kine ki dei tang ki kyntien jong ka Kangana ne don kiwei pat kiba la copy ia ki? Lada ym dei, te balei ka BJP ka sngap jar halor katei ka mat?”
Ka Ranaut, kaba la pawnam na ka bynta ki jingkren pynkhihwin jong ka, ka la long ka nongkynthoh jur ia ka jingpyrshah jong ki nongrep ia ki lai tylli ki ain rep kiba la weng noh mynta. Ha u snem 2020, la kynnoh ba ka la ithuh bakla ia kawei ka longkmie nongrep na Punjab kaba dang iashim bynta ha ki jingiakhih bad khot ia ka kum ka Bilkis Bano – ka longkmie kaba la tymmen kaba la kylla long kawei na ki khmat jong ki jingiakhih pyrshah Citizenship Amendment Law (CAA) kham mynshwa ha Shaheen Bagh jong ka nongbah Delhi. . Ka la ong ruh ba katei ka kynthei ka long “kaba lah ban ioh na ka bynta T 100”, kaba pyni ba lah ban thung ia ka na ka bynta ki jingiakhih. Kane ka jingkren ka la pynmih ïa ka jingïakynad kaba jur kaba la mih biang ha ka por ba ka Ms Ranaut ka la shah shoh ha kawei ka kynthei pulit jong ka Central Industrial Security Force (CISF) ha kad liengsuiñ jong ka Chandigarh katba ka dang leit sha Delhi ha u Rymphang mynta u snem.
