Ka jingjia bym poi pyrkhat la lap hynne ka step ba ka ophis u Deputy Commissioner, West Jaiñtia Hills District kala shah patrong naphang ki wire haki bynta lynti iaid (Passage) ba don hapoh kane ka ophis, ha kaba katkum ki dak ki shin la iohi ba ki runar kila ot pyndkut ruh iaki wire haki jaka ba ki shem jingeh ban patrong. La sakhi ruh ba kila pynsaphret sha madan iaki jingtap wire (casing wire).
Halor kane ka jingjia ym pat lah ban tip kumno ki runar ki iohlad ban rung, bad ruh haduh katno ka jingshah pynjulor, bad la dang don ne em kiwei pat ki tiar ba shah tuh na kane ka ophis, namar haba pyrshang ban kylli na u DC hynne ka janmiet u DC u ong ba um pat lah ban ong ei ei namar ba ma u ruh um pat ioh ka jingtip ba tikna halor kane ka jingjia.
Katkum ka khubor ba iohlum la ong ba ia kane ka jingjia la dep register case ha Jowai police station bad naka liang ki pulit ruh ki dang iaid shakhmat iaka jingthohkit.
