Hadien ka jingkynnoh ba ka sorkar ka la ai kam sop sop ia u Vikram Singhania ban maramot ia ka Pinewood Hotel, ka Meghalaya Tourism Development Corporation (MTDC) hynne ka sngi ka la pynshai ba kam pat ai kano kano ka kam ia u Vikram Singhania haduh mynta.Ka MTDC ka la pyntip shen ka MTDC kan sa khot ia ka Tender halor kitei ki kam hadien ba la ioh jingmynjur ia ka Detailed Project Report (DPR).Katkum ka kyrwoh na ka Kong BL Lyngdoh jong ka MTDC ka la ong, “Ngi kwah ban pynshai ba kam shym la don kano kano ka jingaiti ia ka kam sha u Vikram Singhania. Hynrei ka tnad kan sa khot ia ka tender naka bynta ban shna maramot bad pynbha, kata hadien ba ka sorkar kala dep ai jingmynjur iaka DPR bad ka jingkhot Tender kan long ha ka lynti kaba khuid ba suba, kaban ailad ia baroh ki kontraktor ka jylla ban iashimbynta”.Ka Kong Lyngdoh kala pynthikna ba ki kontraktor ka jylla kiba la pyndep ia ki jingbuh kyndon da ka Engineering Wing jong ka tnad, kin ioh nyngkong ia ka lad ban pynthikna ba kan don ka jingiadonbynta bad ka jingiohnong ia ka imlang sahlang bad kala pynthikna ia ki paidbah bad ia baroh kiba donbynta ba ka jingmaramot bad jingpynbha iaka Pinewood Hotel, kan iaid ha ka jingkhuid jingsuba bad ka jingailad ia baroh lang..
Ka la bynrap ba ka sorkar ka ieng skhem ha kaban bat ia ki jinglong kyrpang ha ka jingpyniaid ia katei ka projek, ban ai ia ka jingshaniah bad ban pynthikna ba katei ka projek kadei ban long kaba seisoh bad dei ruh ban pyndep ia ka kam ha ka por kaba la buh.Yn ialeh ban kyntiew ia ki jingdon jingem jong katei ka jingtei kaba don nam bad kaba rim, ban pynthikna ba kan don iaka jingkyntiew katkum ka jingiaid ka por hynrei yn pynneh pynsah pat ia ka jinglong kyrpang jongka.Ia mynta ki kam ki jam ki dang iaid shakhamt ha kaban pynkhreh ia ka DPR ban maramot bad shna pynbha ia ka Pinewood Hotel.Ha katei ka projek ka kynthup ia ki kam ban shna pynbha ia ki bynta kiba shapoh jong ka Banquet Hall, Kitchen, Restaurant, Restaurant extension, Coffee Shop, Lobby & Reception, Conference Room ryngkat bad ka jingkyntiew ia ki Furniture, Lighting, bad HVAC.
Ka Kong Lyngdoh ka la pynshai ruh ba katei ka jingmaramot bad jingshna pynbha ka kynthup iaka jingdon lypa jong ki jingtei da ki dieng, kiba bun ki kam ki jam ia kaba la dep ban khmih bniah lypa bad kumta la pyndonkam ia ki nongbylla na ka bynta ban pynhap ia ki bynta jong ka sad bad ia ki lyntang dieng kiba siang ha ka kitchen, restaurant bad banquet hall hapoh ka jingkhmih jongka Design Consultant.Ka la ong ba katei ka bynta ka long kaba kongsan bha na ka bynta ban khmih bniah bad ban peit ia ka jinglong jingman jong kajingtei bad ban batai bniah ia ki kam ki jam kiba hap ban trei kiban donkam ha ka DPR kaba pura bad la pyntip ba ka Rose Studio Private Limited, kaba dei ruh kajuh ka kynhun kaba la pynwandur iaka Meghalayan Age Store ha New Delhi, la pyndonkam ia ka kum ka Design Consultant na ka bynta kane ka projek.
