U Symbud Myntri Rangbah ka Jylla u Bah Prestone Tynsong ula pyntip ba shen u Myntri Rangbah ka Jylla Assam bad Meghalaya kin sa iakynduh lang ban pynbteng biang ia ka jingiakren pynbeit pud. Lah ban kdew ba haduh mynta, ka jingiakren pynbeit pud haka wat ba ar (phase-II) ban pynbeit ia ki 6 tylli ki jaka ba iakajia pud hapdeng ki ar Jylla ka dang sahkut namar bun ki daw.
“Halor ka jingpynbteng biang ia ka jingiakren pud, dang shen u CM ka Meghalaya bad CM ka Assam kila iarai ban sa ia shong jingalang biang shuwa ban pynbteng ia ka jingiaken, shuwa ban pynbteng ia ka sorjamin. Shen ngin sa iashong bad ki Regional Committee jong ki ar Jylla ruh kin sa sdang biang ia ki kam” la ong u Bah Prestone.
U Bah Prestone ula ong ba baroh ki Regional Committee jong baroh artylli ki Jylla kin dang hap ban pyndep ia ka jinghiar jurip kaba bniah haki jaka iakajia. “Hooid kila leit jurip ia katto katne ki jaka hynrei ki dang donkam shuh shuh ia ka por ban leit bad hadien ba ki arngut ki CM kila iakynduh, ngin sa tip ia kaei kaba ngi dei ban leh” ula bynrap.
