Ka jingud jingnam na ka jinglip khah khah ka bor ding elektrik ha ki shnong bapher bapher ka Mawkynrew Constituency khamtam ha ka por slap shen kan sa duh noh namar shen yn sa pyntreikam noh ia ka Sub- Station ba 33 KV ha Umtong. Ha ka 21 tarik u Nailar, 2024, u Myntri ba dei khmih ia ka tnad kam pynmih bor ding elektrik ha ka Jylla, u Abu Taher Mondal ha jingiadon lang u MLA ka Mawkynrew, u Bah Banteidor Lyngdoh ki la hiar ban jurip ia katei ka Sub- Station bad ka jingpyntrei ka sah sa tang khyndiat. Na kane ka Sub-Station, kan pynmyntoi ia bun tylli ki shnong ba don sha ki bynta ba kham sharum na ka shnong Mawkynrew ha kaba kin ioh bor ding elektrik thikna man ka sngi. Kumba long mynta ka bor ding elektrik ha ka thain Mawkynrew ka wan lyngba na ki thain Mawryngkneng bad na Jongksha bad kane ka long kaba khia haduh katta bad bun sien ki shnong ki ioh bor ding elektrik tang khyndiat kynta ha ka shi sngi. Ha kane ka jingjurip la ia donlang da u BDO ka Mawkynrew C&RD Block, u Bah G Dhar, MCS, ki ophisar ka tnad MeECL, ki nongïalam shnong lem kiwei pat.
U AT Mondal haba kren lyngkot sha ki lad pathai khubor ula ong, “Kane ka Sub-Station kan treikam noh kloi katba lah namar ka jingtrei ka sah sa tang khyndiat”. Da kaba pynpaw ka jingkhublei ia u Bah Banteidor uba la shim khia ban pynkloi ia ka jingpyntrei ia kane ka Sub-Station, ula ong ba u Bah Banteidor u la kyntu ban wan jngoh ia kane ka Sub-Station bad ai khublei ia ka jingïatreilang na ka liang ki Dorbar Shnong ha katei ka thaiñ. U la ong ba watla ka don ka jingduna nongtrei ha kane ka Sub-Station hynrei un ïakren sha ka Sorkar ban pynbun ia ki bad kumjuh sha ka tnad Finance khnang ba kan long ka jingmyntoi ia ki shnong ka Mawkynrew Constituency bad ki thaiñ marjan.
Hadien kane, u Mondal uba dei ruh u Myntri ba dei peit ia ka tnad Community and Rural Development, u la leit ban jurip ia ka jingshna thymmai ka ophis u BDO ka Mawkynrew C&RD Block kaba dang iaid shakhmat mynta.
