U Bah Commingone Ymbon myntri ka tnat Food Civil Supplies & Consumer Affairs ha ba ai jingkren kum u kongsan hynnin ka sngi ha ka lyngkhuh snem ba Khyndai ka seng All Jaiñtia Muster Roll Workers and Labour Union, Central Executive Body ba la pynlong ha shnong Shangpung, West Jaiñtia Hills District, ula pynbna paidbah ruh ba shen ka sorkar kan sa pynkiew ia ka bainong ki nongtrei Muster, namar katkum ka jingshisha dei ban pynkiew man la ka 5 snem. Ula ong na ka liang ka tnat Labour ruh ka la dep wanrah ia kane ka mat bad ka sorkar ka la dep shong iakren ha ka taiew ba la dep na ka bynta ban pynkiew bainong.Ula bynrap ka sorkar ka la pynlut da ki spah klur shibnai na ka bynta ban siew tulob ia ki Muster Roll, hynrei u diaw pat ban iohi ia ka jingbym shimkhia jong ki ban pynkhuid ia ki nala kumta yn da slap ka um ka tuid nalor surok bad wanrah ka jingjulor kloi ia ki surok khamtam kiba dang shu dep shna ruh.
Kumta u kyntu haba la shimti ia ka kam ym dei ban khwan tang ia ka bainong hynrei ban trei minot ruh ia ka kam, khnang kan ym don jingeh ban kyntiew ia ka sorkar bad ka imlang sahlang. Kiwei pat ba ai jingkren kynthup u Advicer ka seng All Jaiñtia Muster Roll Workers and Labour Union, u Khroo L.Pariat, President kong Dayoowanphi Ïakai, General Secretary Hunbeitki Dkhar, nangta u Jerry Anderson Suting president Mid Day Meal ki la pynsngew ia ka jingiaid lynti ka seng naduh ba sdang haduh mynta.
Nalor ba ki la pynsngew ia ki mat jingdawa ba la ioh na ka sorkar, lyngba ka dorkhas ki la dawa ruh ia ka sorkar ban pyntreikam noh ia ka Regular Casual workers scheme 1996, ban pynkiew ia ka rta shongthait kiba trei Muster Roll, ban pyntreikam ia ka maternity Act, 1961 kaba la pynkylla ha u snem 2017 ban pyntreikam ia ka Employees Provident Fund bad kiwei.Ki nongtrei Muster Roll kumjuh ki nongshet ja sngi ha ki skul bapher hapoh ka lama ka All Jaiñtia Mid Day Meal Worker’s Union kiba la donlang ha kane ka sngi ki la ioh ruh ka jingbatai pynsngewthuh halor ka jingpang HIV AIDS ba la lamkhmat da u Deputy Director (IEC and Mainstreaming) Meghalaya AIDS Control Society u Ajoy Lanong.
