Ka Khasi Hills Autonomous District Council (KHADC) ka la rai ban pynmih noh ia ka thup ki Jait ki Kur Khasi ba don hapoh ki 5 tylli ki District ka Ri-lum Khasi kiba hap hapoh ka District Council. Ia kane la pyntip da u Deputy Chief Executive Member (Dy CEM) ka KHADC u Bah Pynshngain N Syiem hadien ka jingialang ba la pynlong da ka KHADC bad ki Nongmihkhmat jong ki Seng Kur bapher bapher lem bad ki Khlieh Nongsynshar hadien ba mih ka jingiatai ban khein Scheduled Tribe bad ka bynta jong ki Seng Kur. Haba kren sha ki lad pathai khubor u Bah Pynshngain ula ong “Ngi la rai ban wanrah noh da ka thup jong ki Jait ki Kur Khasi kiba don hapoh u pud u sam ka Council bad kumta, ngi la kyrpad ia baroh ki Kur ba kin phah ia ki jingtip ba bniah sha ka Council khnang ba ki Kur jong ki kin shah kynthup ha kane ka thup”.
U Bah Pynshngain ula pyntip ba ka jingialang kala iatai ruh halor ka jingdonkam ban wad la ki don ne em ki Kur ne Jait kiba la klet ne bym don shuh ha shuwa ban pynmih ia ka thup ba khatduh jong ki Jait ki Kur Khasi kiba don hapoh u pud u sam ka Council. U Bah Pynshngain u ong ba ka thong jong kane ka long ban pynbeit ryntih ia ka rukom pyniaid ia ki Kur ki Jait (Clan Administration) hapoh ka Ri-lum Khasi-Jaintia. “Hadien ba ngi la shim ia ki jingai jingmut, ngi sngew ba ka long kaba donkam ban don ia ka thup ki Kur ki Jait Khasi hapoh u pud u sam ka Council khnang ba ka jingai syrnod (certificate) kan long ha ka lynti kaba dei” ula ong.
U la ong ba ka Council kan sa pynlong biang ia ka jingialang halor kane ka kam ban ioh iadonbynta lang baroh ki Kur ki Jait Khasi. Haba iadei bad ka jingbatai mano ba dei u Khasi, u Dy CEM ula ong “Ngi la iakren ba kane ka kam kan hap ban iaid kat kum ka KHAD (Khasi Social Custom of Lineage) Act, 1997. Hynrei, ngi dang hap ban iakren ia kane ka kam kumba la pynpaw da kiba bun ki kynhun ha shuwa ban shim rai ia ka kam”. U Nongialam ka Liang Pyrshah Bah Titosstarwell Chyne ula ong ba ka Council ka sngewtynnad ba ki Kur ki jait bapher bapher lem bad ki Khlieh Nongsynshar ki la kyrshan ia ka Lineage Act bad ruh ia ka jingpynbna ba dang shen ba la pynmih da ka Tnad Social Welfare haba ia dei bad ka kam ai Scheduled Tribe Certificate.Ula kyntu ia baroh ki Kur ki Jait Khasi ba kin aiti ia ki jingtip ba bniah khnang ba ka Council kan lah ban pynmih ia ka thup jong ki.
