Ka Hospital 50 jingthiah banyngkong eh hapoh Rilum Jaintia, ba tip kum ka 50 Bedded-Sub Divisionnal Hospital ba la mang ban shna ha ka shnong Jaraiñ ba hap hapoh ka Amlarem Civil Sub-Division, West Jaintia Hills District, ha ka jinglut ba 11 klur ha ka jaka ba heh kumba 7500 sq ft, la leit jurip ia ka hynnin ka sngi da u MLA ka thaiñ u Lahkmen Rymbui ryngkat ka jingdonlang ki ophisar ka tnad ka koit ka khiah, ki bor pyniaid shnong, ki riew rangbah ka thaiñ bad kiwei. Kane ka hospital ym tang ba kan ai jingshakri ia ki shnong ba marjan hynrei ia ki paidbah ka thaiñ Amlarem baroh kawei.
U Lahkmen Rymbui haba kren u ong, ban wanrah ia kum kane ka hospital dei kaba la thrang bad angnud la slem bha da ki paidbah ka thaiñ Amlarem bad kan sa long ruh ka jingkyrkhu ia ki paidbah. U iathuh ia ka jingtrei na ka bynta ka 1st Phase yn sdang noh shen namar ba la dep aiti ia ka jingpyntrei ha u contractor. Nalor ka hospital ki jingtei ki kynthup ruh 13 tylli ki Quarter na ka bynta ki doktor kumjuh ki nongtrei bad la buh por ban pyndep hapoh 24 bnai.
Halor ka jinglah ban wanrah ia kane ka hospital na ka liang u Lahkmen Rymbui u pynpaw ka jingsngewnguh bad aikhublei ia u Myntri rangbah ka sorkar jylla u Conrad K. Sangma, u myntri barim ka tnad ka koit ka khiah u James PK. Sangma kumjuh ia ka Dr. Ampareen Lyngdoh Myntri ka tnad ka koit ba mynta halor ka jingibit ban kyntiew kyrdan ia ka Jaraiñ PHC sha ka 50- Bedded Sub Divisional Hospital.
