Ka Shad Nongkrem ne ka Shad Pomlang jong ka Hima Khyrim mynta u snem ka la kut hadpeng ka jingiphuh iphieng ha madam iingsad ha Smit. Kane ka Shad Pomblang kaba ju long man u snem la pynlong ryngkat ka knia la khriam ka duwai phirat ban bha ka rep ka riang, ka synshar khadar bad riti dustur jong u khasi khara kumba la buh u longshwa manshwa. Ha kane ka sngi, da ki spah ngut ki nongshad kynthei bad shynrang ryngkat ka riam Shad khasi nylla ki la shim bynta nalor ki nongshad na ka iing syiem. Ia kane ka Shad la tip ruh kum ka Shad Pomblang namar ba la pynlong ia ka jingknia bad ka jingpomblang ha kaba kumba 190 ngut ki thei sotti bad 152 ki shynrang ki la shim bynta ha katei ka Shad Nongkrem.
Ki Heh sorkar kiba la wan sakhi lang ha kane ka sngi ki long u Lat ka jylla u CH Vijayashankar, u Chief Justice ka High Court Meghalaya u Indra Prasanna Mukerji, u Symbud Myntri Rangbah u bah Sniawbhalang Dhar. U Myntri ka tnad Kam Jngohkai u bah Paul lyngdoh, u CEM ka KHADC u bah Pyniaid Sing Syiem ha ka jingdonlang u Syiem ka Hima Khyrim u Dr Balajied Sing Syiem nalor ki longheh longsan, ki Myntri bad kiwei de. Ha kane ka sngi ka long ka jingsah kynmaw ia ka Hima Khyrim ha kaba la ioh ruh ban pyllait ia ka Hima Khyrim Act, 2024 da u Lat ka jylla Meghalaya.
Na ka liang Paiem Dr Balajied ula pynpaw ia ka jingsngewkmen hadien ba u Lat ka jylla ula ai ia ka Muhor jingmynjur ia ka Bill jong la Hima Khyrim Act, 2024 ka ban nang pynskhem ia ki riti dustur synshar khadar bad ka niam ka rukom.
