Ka samoi kaba ar jong ka Meghalaya Grassroot Music Programme (MGMP) kan sdang shen ha u bnai Nailur mynta u snem 2024. Ha kane ka kynti ka MGMP ka dei ka prokram kaba la leh ka sorkar jylla ban kyntiew ia ka sap ka phong jong ki samla ha ka rwai ka siaw bad ka tem ka put.
Haba kren sha ki lad pathai khubor, u bah Andreas War u Coordinator ka MGMP Season 2, u la ong ba kiba bun bah ki samla bad ki nongrwai kiba shim ia ka kam rwai bad ka tem ka put kum ka kam bsa ja, kila ioh jingmyntoi na kane ka prokram MGMP. Mynta ka snem, ka MGMP ka la iateh bad ka Hard Rock Cafe India, ha kaba ki nongrwai ki nongtem na kane ka jylla, kiba shah jied ha ka Hard Rock Cafe India, kin ioh ia ka jingkyrshan na ka MGMP ban leit tem sha kylleng ki nongbah ha ka ri India, khnang ba kin lah ban pyni shuh shuh ia ki sap ba ki don ym ban neh sah tang ha kane ka jylla.
La iathuh ba la don ruh ka kynhun tem kaba la shah jied ruh ban leit shabar jylla. Ha ka shi bnai, ka jingpyllong ia ki jingtem jingput kan ym duna ia ka 200 sien eiei ha kylleng ki jaka jong ka jylla Meghalaya bad kumba 600 ngut ki nongtem nongput kin ioh iashim bynta.
