U Myntri Rangbah ka Jylla u Conrad K Sangma hynne ka sngi, ula shim bynta ban pynkhuid ia ka Tura Super Market Complex.Kane ka jingpynkhuid bad jingpynitynnad ia katei ka Iew ka dei kum shibynta jong ka jingrakhe ia ka Swachhata Hi Seva (SHS) 2024 Campaign kaba la sdang ha ka 17 tarik Nailur bad kut noh ha ka 2 tarik Risaw.
Ha katei ka jingpynkhuid ia ka Tura Super Market Complex la ia donlang u Deputy Commissioner ka West Garo Hills, ki Heh ka District bad ki heh jong ka Tura Municipal Board (TMB).
U Myntri Rangbah ula ong, ba ka jingkhuid kam dei ka kam ka ban leh tang shipor ne shisngi bad ula kyntu ia ki nongshong shnong ba ki dei ban pynneh ia ka jingleh khuid man la ka sngi ha ka jingim jong ki bad ki dei ruh ban pynlong ia katei kum shibynta ka dustur pynmlien ha ka jingim jong ki.
