Shimet u bah Bindo um don shuh bad ka UDP

“U Kyrtong ka RDA u don ha ka jingeh bha ban poi sha ka thong,”
Shillong Iaiong: U nongialam barim ka UDP u bah Bindo M Lanong mynta ka sngi, u la ong ba ma u shimet, um don shuh ha ka UDP ym namar ba u pher hynrei namar ba ka party kam ju khot kam ju ong eiei shuh.
U la ong ba ha u snem 2023 ula iakhun ia ka MLA elekshon na Nongkrem kum u kyrtong shimet hynrei hadien u la thoh sha ka party ban iaklet noh ban pyrkhat noh kum ki rangbah namar ba ula don ha ka seng riewlum naduh u snem 1972 uba la poi lut sha baroh ki 36 tylli ki konstitensi bad u la long CEM ka KHADC, ha kaba ula don ka jingithuh bad iajan bad ki khlieh nongsynshar, hynrei ka UDP kam ai tiket ia u ban iakhun ia ka MP elekshon ruh bad ka la ai ia u bah Robertjune Kharjahrin uba dang thymmai.
Ha ka jingiohi jong u bah Bindo, u kyrtong ka Regional Democratic Alliance (RDA) u don ha ka jingeh bha ban poi sha ka thong watla ka shong ha ka rai jong u paidbah ban rai.
U la ong ba hadien ba ka UDP kam khot shuh sha ka jingialang, kum u riew pdeng, kum u MDC shu sieh, ha kaba khadduh u la shim ia ka rai ban kyrshan ia u bah Pyniaid Sing Syiem u CEM ka KHADC kum u briew uba kynjai, u nongialam ba tbit watla u ba thymmai, uba shai ka ktien ka thylliej, uba bha jinglong.
“Nga shimet ngam don shuh ha ka UDP, ngam dei ba mih ma nga hynrei ha 2023 nga ialeh elekshon na Nongkrem, nga khlem ioh tiket, ioh u bah Lambor Malngiang, u bym dei na UDP, bad hadien kane, nga la thoh ban iaklet noh, ngin ialeh noh kum ki riew rangbah, ha kaba nga don ha seng riewlum kum u khynnah samla naduh 1972, nga la poi lut ha baroh 36 tylli ki konstitwensi, nga la bat kum CEM ha KHADC, ngam pat ju shim pisa san tyngka ruh na uno uno u khlieh nongsynshar haba thung ia ki. Watla ki don kiba wanrah da ki lak nga kyntait, hynrei ki don ba wanrah tang ar tylli ka dohkha, u jop uta”, u la ong.
U la ong, “Lada ialeh MP ma nga, nga don ka jingiadei kaba iajan ia ieid bad ki khlieh nongsynshar hynrei ka UDP kam ai tiket ia nga. Ka ai ia u bah Robertjune Kharjahrin u dei uba bha tangba u dei uba dang kham khynnah namar ba ym dei kane ka juk kum ha ka por jong bah GG Swells”.
U la ong ba um kwah ban ialap iano iano hynrei kaei kaba khmih lynti ka long ba ka ri India ka shngain, ban pynneh ia ka synshar paidbah bad ban khang lad ia ka BJP, u don ka jingsngew khia bad khmih lynti ba ki paidbah kin shemphang kumno bad iano ban kyrshan.
“Hadien ba kim khot shuh sha ka jingialang, kum u riew pdeng, kum u MDC shu sieh, ha kaba khadduh nga la shim ia u bah Pyniaid Sing Syiem kum u briew uba kynjai, u nongialam ba tbit watla u ba thymmai, uba shai ka ktien ka thylliej, uba bha jinglong, ka la don ka jingiasyllok haba ngam don shuh ha ka UDP, nga kyrshan noh ia ka EC jong u bah Pyniaid Sing Syiem”, la ong u bah Bindo.
“Halor ka elekshon MP ba mynta, ngan hap ban pyrkhat bha bad kyrmen ba ki paidbah kin kham stad kin kham shai”, u la ong.