Ka Sorkar Jylla kala ai bor ia ki Deputy Commissioner (DC) jong baroh ki District ka Jylla ban pyndep ia ki jingdonkam ban ioh jaka ban tei ia ki Eklavya Model Residential Schools (EMRS) hapoh Meghalaya. Lah ban kdew ba ka Meghalaya kala ioh 38 tylli ki skul EMRS na ka tnat Tribal Affair ka Sorkar Pdeng hynrei haduh mynta tang 2 tylli ki skul kiba la jan dep ban sdang pyntreikam. Ha ki snem bala dep iaki EMRS School hapoh Meghalaya la pyntreikam daka Manipur Industrial Development Corporation Limited (MANIDCO) kaba la jan dep tei tang 2 tylli napdeng ki 38 tylli ki Skul.”Iaka ba mynta ka jingpyntrei ia baroh ki EMRS skul hapoh ka Jylla la aiti shaka Sorkar Jylla bad mynta ki kam ki jam kila iaid shakhmat ban pyndep lut ia baroh” la ong u Myntri ka tnat Pule Puthi u Rakkam A Sangma.
U Rakkam u la iathuh ba napdeng ki 38 tylli ki skul, kumba 22-25 tylli ki skul kila iohi iaki dak ki shin bala sdang pyntrei bad 2 tylli kila jan dep artad. U la iathuh ba haki katto katne ki jaka, ka Sorkar ka shem jingeh ban ioh jaka ban tei iaki EMRS skul bad naka liang ka Sorkar Jylla kala bthah iaki DC bad ki BDO ban leh iaka ba donkam. “Kaba eh ka long baka Sorkar Pdeng ka kwah ba ki Sorkar Jylla kidei ban ai ei ki jaka ban tei EMRS skul hynrei baroh ngi tip baka jinglong trai khyndew bad jaka ha Meghalaya ka iapher bha ha baroh kawei ka Ri India bad mynta ngin ialeh katba lah ban ioh jaka khnang baka ki kam ki jam kin iaid beit iaid ryntih” u la ong.
Haba pynpaw baka Sorkar Jylla ka shim khia ban kyntiew iaka pule puthi, u Rakkam u la ong “Ka tnat pule puthi bad ka Sorkar Jylla ka shim iaka jingkit khlieh ban pyndep ia baroh ki EMRS School hapoh Meghalaya”.
