Ka them Ri Bhoi District khamtam ka thaiñ jong ka sor Nongpoh bad Khanapara ka la mad ia ka jingshlei Um kaba na ka por sha ka por da dei ba neh ka jinghap slap kumba 1 kynta ne 2 kynta bad kane la kynnoh ba ka jingshlei um ha kine ki thaiñ ki jia tang namar ka jingbym biang ki nala ban tuid suk hynrei ka um ka kiew pynban sha ki surok ki lynti synkien bad buh jingeh pat ia ki paidbah nongleit nongwan ki kali kiba iaid ba ieng lyngba u surok bah.
Lah ban kdew, ba ka thaiñ Nongpoh man la u snem ka ju mad ia kane ka jingshlei um khamtam ha ka aiom lyuir ba jur u slap bad bun jingeh ia ki paidbah nongleit nongwan bad ki kali kiba ju pyndonkam ia u Service Lane ba la tei naduh ba shna ia u surok Fourlane ha kane ka district, ha ka 5 tarik Nailar ka jingshlei um ka la jia ha ka lad Bethany Hospital terter shaduh Lad ka School Alpha English Higher School bad ha ka thaiñ Nongpoh Proper ha kaba la sakhi ruh ba bun tylli ki thukthuk ki la per halor ka sla um bad ki khynnah skul ki la mad jingeh ban jam sha shilliang u surok bad hap ban pyndonkam ia ki jingker nar ban lait na ka um.
Ha ki thaiñ sharum Nongpoh ka jingshlei um ka la jia naduh ka shnong Mawsmai 11 Mer, 9 Mer Baridua bad kiwei kiwei ki bynta bad ktah ruh ia u surok National Highway 37 bad pynthut ia ka leit ka wan ki paidbah bad ki kali ki motor. Ha kane ka jingjia shlei um ha Ri Bhoi District la sakhi ruh ba bun tylli ki iing briew bad ki dukan ki la mad jingeh na ka jingkiew jong ka Um sha ki bynta ki iing ki sem bad ki dukan briew.
Lada u ne u slap u dang neh sa kumba ar ne lai kynta, imat ka um Kan nang kiew bad lah ruh wat ban tap ia ki katto katne ki iing briew bad ki dukan kiba don harud u surok bah National Highway 06 namar tad haduh ba la sakhi mynta ka janmiet la iohi ba ka um ka sdang ban rung shapoh ki dukan bad kot ruh haduh jan synkai ia ki katto katne tylli ki iing briew.
