Kum ka dak ban kyrshan ia ki khun samla ka thain Ri Bhoi Sepngi kiba don ia ki sap bapher bapher da kaba ai rynsan ia ki ban pynpaw paidbah bad ban pynphuh pynphieng shuh shuh ia ka jingrakhe ia ka sngi Laitluid kaba 78 ka ri India, ka ophis u Sub Divisional Officer, Patharkhmah Civil Sub Division ha ka jingiatreilang bad ka ophis u Block Development Officer, Jirang C&RD Block ka la pynlong ia ka tama Jowe Festival 2024 ha ka 13 bad 15 tarik u Nailar ha ka madan ialehkai jong ka Western Ri Bhoi Sport Association, Patharkhmah. Ia kane ka tamasa Jowe Festival, la kyrshan da ka ophis u Deputy Commissioner ka Ri Bhoi District lyngba ka jingmang pisa ruh na ka Chief Minister’s Special grand bad ka Meghalaya Sustainable Tourism enhancement Programme (MSTEP).
Watla hapdeng ka jingpynthut ka mariang namar ka jinghap u slap, hynrei la sakhi ia ka jingiashim bynta kaba shitrhem jong ki spah ngut ki samla ka thain Ri Bhoi Sepngi kiba la shim bynta ha ki rynsan iakob bapher bapher ba la pynlong ha kane ka tamasa kynthup naduh ka jingiakop Drama, Singing, Dancing, Fashion Show, Music, Cooking challenge, Football bad kiwei bad la pynkut pat ia kane ka tamasa da ka jingiakop Thei bad Rang Bhabriew ba la tip kum ka Miss & Mr Western Ri Bhoi. Ka jingthmu jong kane ka tamasa Jowe Festival ym tang ban kyntiew ia ki khun samla hynrei la pynlong ruh shibynta ban pynneh pynsah bad ban kyntiew ia ka riti ka dustur, ka kolshor, ban plie lad ia ki riew paidbah ban kren ne ia phylliew ia ki jingdonkam ban kyntiew ia ka thain Ri Bhoi Sepngi bad ruh kumno ban wanrah ia ka jingshakri paidbah kaba bit kaba biang ha kane ka thain.
La wan ban shimbynta ha kane ka sngi pynkut ia ka Jowe Festival, da u Bah Sosthenes Sohtun, MLA ka Jirang Konstituensi kum u kongsan, u A. Baranwal, IAS, Deputy Commissioner ka Ri Bhoi District, u Bah M.B. Tongper, SDO (C) Patharkhmah, u BDO Jirang, ki ophisar na ki tnat treikam sorkar bapher bapher bad ki nongialam shnong ka Ri Bhoi Sepngi.
