Ka Mawkynrew Sohphlang Eco-Cultural Indigenous Society ka la pynlong ia ka iew tamasa Sohphlang ia kaba la pynlong ha Lad-Kharang Mawkynrew East khasi Hills. Ia kane ka tamasa Sohphlang la wan plie da ka Myntri ka tnad kam rep ka Kong Ampareen Lyngdoh. Ia katei ka tamasa la pynlong da ka jingkyrshan ka tnad Basin bad ka Tourism ka Sorkar Jylla kum shi bynta ban kyntiew ia ka kam rep soh-phlang hapoh ka thain Mawkynrew bad ka Jylla baroh kawei. Ha kane ka tamasa iew Sohphlang, la sakhi ba ki nongshong shnong lyngba ki Self Help Group ha kane ka thain ki la wanrah ia ki tiar ki tar ban die, nalor ki jingbam tynrai, ki jingbam ba pynshongshit ia kane ka tamasa ha ka sien ba ar halor une u jait jingbam tynrai.
Haba kren ha ka jingïalang, ka kong Ampareen Lyngdoh u la pynpaw ka jingsngewkmen ba ryngkat kiba ia don bynta lang baroh ki la lah ban pynlong ia kane ka tamasa kaba jop bad bynrap ba kane ka tamasa dei nan pynlong noh man u snem. Ia u Sohphlang la shim ba um dei tang u mar bam tynrai hynrei u dei uta u jait jingthung ia uba la pyndonkam ha kaba shna dawai ban ioh jingkoit nalor ka jingpyndonkam ia u ha ka niam ka rukom bad ka riti dustur u Khasi.
Ka Kong Ampareen ka pynpaw ba ka Mawkynrew ka dei kaba la kyrkhu da ka mei mariang, kala ong ba ki jaka jngohkai kiba don ha Mawkynrew ki la kylla long ki jaka kiba ki nongwan jngohkai ki wad bha mynta ki por. Na ka liang kiba pynlong ia kane ka tamasa ki la ong ba kane ka tamasa ka ai ka lad ia ki nongshong shnong ban ia long kawei bad iasnoh kti lang ban pynshongkun ia ka. Kane ka tamasa ka long kum ka rynsan ia ki khun samla ban pyni ia ki sap ki phong kiba ki don la ka long ha ka shad ka rwai, ka put ka tem nalor kiwei.
