U MDC ka Nongkrem u bah Lambor Malngiang ula sneng ia u MLA ka Nongkrem u bah Ardent Miller Basaiawmoit, ba un pyrkhat shwa ialade shwa ban kren ia kiwei. Haba pynphai nia ia ka jingkren expired date ne ba la kut por ia ki MDC, u bah Lambor ula ong ban kren ia kane ka kyntien expire date, u la dei ban pyrkhat jylliew shwa ialade. “U bah Ardent udei ban nang ban kren ha shwa ban kren pyrshah ia ki MDC kiba trei na bynta ka bha ka miat jong ki paidbah bad ki ieng na bynta ban pynkhlain ia ka District Council,” la ong u bah Lambor bad u la bynrap “ Ka dang bha ban don ia ki MDC kiba Expired kiba trei na bynta ki paidbah ha ki konstiwensi lajong ban ia kaba shu iehnoh ia ka kam tang shipor hadien ba la shah jied kum u MDC.”
U la ong ba dang lah ban long MDC ba la kut por ban ia kaba risain mar syn long MDC. U la ong ba ka don ka kyndon ka ain kaba shah ban pynjlan ia ka samoi katkum ki nongrim bad dei na kane ka daw, ba u Lat ula pynjlan.
Ha kajuh ka por, u bah Lambor ula kren shai ba un iakhun ia ka elekshon MDC kaban wan kum u kyrtong shimet. Katkum ka jingong u bah Lambor, ki paidbah ki peit ia u briew, ym ia ka party.
