“Sngewbha ïarap lem ïa ngi “, kyrpad kibym don ïing shuh ha Lawkynter

Ka jingkhie kynsan ka eriong haka miet jong ka sngi u blei ka 31 tarik u Lber 2024 ha kylleng ka Eastern West Khasi Hills District ka la pynjulor ia ki ïing ki sem ha kaba ka shnong Lawkynter Laitdom ka dei kawei na ki shnong kaba la shah ktah ha kane ka jingwan lyngshop ka eriong bad la sakhi ruh ba ki don ki ïing kiba la lap satang ia ka nongrim ïing ha kaba ka eriong ka la rat lut ia baroh ki jingdon jingem bad kila don ruh ki paidbah kiba la mynsaw bad shah pynkit sha ki jaka sumar bad nalor ki ing jong ki briew kiba la shah pynjulor ki kynthup ruh ia artylli ki skul, ka dispensary bad ka ophis treikam ka Village Organisation.

U sordar jong ka shnong Lawkynter u bah P. Kharmawlong u la iathuh ba palat 80 percent ki ïing kila shah ktah ha kane ka jingwan lyngshop ka eriong bad u la pynpaw ia ka jingaikhublei iaki tnat treikam bapher bapher jong ka sorkar kiba la kloi ban wan jurip bad ban kner ia ki jingiarap da kaba buh ruh iaka relief camp naka bynta kito ki longing ki bym don shuh iaki ing ban shong ban sah da kaba ai ruh iaka bam bad kiwei kiwei ki jingdonkam bad haka juh ka por ula kyrpad iaka sorkar ba kan thaw lem iaki lad jingiarap kiba kham kyrkieh.

Ki paidbah kiba la shah ktah ha kane ka jingwanlyngshop ka eriong kila pynpaw iaka jingsngewdiaw ba kila duh noh iaki ing ki sem bad ki kyrpad iaka sorkar ba kin iarap lem iaki namar kim don shuh tang ia ka ïing ban shong ban sah. Kiwei pat ki shnong hapoh kane ka district kiba la shah ktah haka jingwan lyngshoh ka eriong ki kynhup iaak shnong Rikhen, ka shnong Nongrang, ka shnong Nongrmai, ka shnong Thammaw,Mawroh Laitdom bad ka shnong Nongthymmai.