Ka jingiakhih ki Nonghikai SSA hapoh ka Jylla kala neh mynta la 15 sngi bad ka jingkylli, ka mih mynta, hato kane ka jingpep trei ki Nonghikai kan ktah ne em iaki khynnah skul. Ka tnat Pule Puthi ka Sorkar Jylla shen kan sa khot iakren bad ki School Managing Committee (SMC) kiba thungkam iaki nonghikai SSA ha man la ki School hapoh ka Jylla ban iakren halor ka jingpep trei jong ki. Lah ban kdew ba ki Nonghikai SSA hapoh ka shatri All Meghalaya SSA School Teachers Association (AMSSASTA) kila sdang iaka jingiakhih naduh 1 tarik Nailur ha Madan Malki ban dawa naka Sorkar Jylla ban kyntiew 100% ka tulop.
Haba pynpaw ka jingbynniaw namar ka jingpep trei ki Nonghikai SSA, u Myntri ka tnat Pule Puthi u Rakkam A Sangma u la ong “Nnga sngewsih ba ki Nonghikai jong ki mih madan hynrei nga kham sngewsih ba ki khynnah skul kim don nonghikai hala ki skul”.“Mynta ki skul kila sdang plié biang. Nga kyrpad iaki Nonghikai ba kin leit phai biang shala ki skul ban ai jinghikai iala ki khynnah hala ki kamram Class. Kidei ban pyrkhat lang iaki khynnah skul” la ong u Rakkam. Haba kylli hato ka Sorkar kan shim sienjam pyrshah iaki Nonghikai ba pep trei, u Myntri u la ong “Ka Sorkar kan sa leh eiei hynrei kaba nyngkong kadei hi ban iakren shwa bad ki SMC kiba thungkam iaki Nonghikai SSA”.
U Rakkam u la kubur baka jingdawa jong artylli ki kynhun nonghikai SSA ki long kiba shong nia hynrei ka Sorkar Jylla kam lah ban shu rai kyrkieh halor ki artylli ki jingdawa ba ki buh hakhmat ka tnat Pule Puthi.“Ka jingduna pisa kadei ruh kawei ka daw baka Sorkar Jylla kam lah ban shu shim rai kyrkieh halor ki artylli ki mat ba ki Nonghikai SSA ki buh. Hynrei ngi la shimkhia iaki jingdawa bad dangshen ruh ngi la shong jingialang bad u Myntri Rangbah ban iakren halor kane. Ngi la bthah iaki Ophisar ka tnat ban wad ki lad lynti kumno ban jam shakhmat haba iadei bad ka jingdawa kyntiew tulop 100% bad ban ai jingithuh ba pura iaki Nonghikai SSA” u la ong.
