Hynne ka sngi ha ka kynta iatai ia ka bill pynkylla constituency bad ruh ka jingpynkynriah iaki shnong na kawei ka constituency sha kawei pat, kaba la wanrah hapoh ka dorbar kyrpang ka JHADC hynnin ka sngi da u CEM u Thombor Shiwat, hadien ba la dep pyniaid ryntih bad pynbit pynbiang da ka Delimination Committee, napdeng ki 12 ngut ki MDC ba shim bynta ban iatai halor kane Bill, u Finelyness Bareh u dkhot ka Executive Committee ruh ula ieng ban kren halor kane ka Bill da kaba ong ba u khlem pyrshah ia ka, hynrei u pynrem jur bad sngewsih kthang ia ka jingleh ka Delimitation Committee, ha kajuh ka por ruh u ong ba um hun satia ia ka rukom phiah namar ba ka jingiapher ki vote ka la kot haduh palat 5000. Ula kynnoh ia ka Delemination Committee da kaba ong ba kam shlem la leh haka rukom ba biang ban hun lang ki MDC bad ruh ka jingpynkynriah iaki shnong ki thaw kam long kaba beit ryntih. Halor kane u MDC ka liang pyrshah pat u Lakhon Biam ula ieng ban ai jingkyrshan ia kane ka Bill da kaba ong dei ban mynjur beit iaka mynta ka sngi namar shwa ban wanrah hapoh ka ïing dorbar ka Executive Committee kala dep bishar bniah lypa naduh ki dkhot ka Delimitation Committee, bad ruh kane ka committee kam lah ban leh palat iaka bor bala bthah iaka da ka EC JHADC.
Bad lada dei shisha ba kane ka Bill ka wan beit hapoh ka ïing dorbar naka kti ka Delimination Committee khlem da iaid lyngba ka EC jong ka JHADC u sngew iahap hi iaki MDC liang synshar ban kynnoh iaka Delimination Committee. Ula takraiñ iaki MDC liang synshar kiba pyrshah iaka kane ka Bill da kaba u ong, San snem shiteng phi la kyrshan ia kane ka EC, mynta pat phin ong ba phi pyrshah ia kita ki dkhot ka Delimitation Committee ki bym don hapoh ka ïing dorbar thaw aiñ ne don hok ei ei halor kane ka Bill ?. “Jngshisha lada phin i biang iaka EC naduh mynshwa phi la dei ban kyntait iaka, hynrei mynta pat bala jan poi ka election phin ong ba pyrshah kam iahap shuh” ong u Lakhon Biam. Bad lada ong ban dang peit bishar biang ka mut bala thmu ban pynjlan biang iaka por treikam MDC.
U ong ruh ba ka por kam shah shuh la dei ban hiar madan iakhun beit iaka election lada jop ne rem ruh. Ki MDC ba kynthup naduh kiba don haka liang pyrshah bad liang synshar, u Awhai Andrew Shullai, u Arbor Hima Darnei, u J.Treilang Suchiang, U Brighstar Chyrmang, u Saron Paswet, u Rubinus Syngkon, u Richard Singh Lyngdoh, u Lomris Lyngdoh, u Dawan Lyngdoh, u Aiborlang Shadap kila pynsngew halor ka jingkyrshan bad jingpyrshah ia kane ka Bill hala ka jong ka jong ka nongrim. Hynrei hadien ka jingiatai bala shimpor kumba ar kynta ei ei kane ka Bill ba tip kum ka “The Jaiñtia Hills Autonomous District (Constitution of District Council) (Amendment) Bill, 2024″, kala ioh iaka jingmynjur daka jingpyni iaka jingbun paid lyngba ka jingrahkti ki MDC ba kyrshan iaka.
