Ka surok na Lumshyiap-Mawpat sha Ishyrwat ka la buh jingeh ia ki paidbah kiba leit ba wan namar ba la sniew bad la bun da ki tliew ki syar ha shi lynter ka surok. Ka Mawpat ka dei ka lynti kaba pyniasoh ia ka sor thymmai bad ka sor rim bad ki kali ym tang na kane ka jylla Meghalaya ki pyndonkam ban iaid na katei ka surok hynrei wat naduh bar jylla ki iaid lyngba kane ka surok. Ha ka jingiakren bad u Rangbah shnong ka Mawpat u bah Juda Wahlang ula ong, ba ka jingsniew kane ka surok kam ktah tang ia ki nongshong shnong ka Mawpat hynrei ka ktah ia ka jylla baroh kawei namar ba kiba bun ki pyndonkam ban iaid ban leit sha Sor Shillong Thymmai. U bah Juda ula ong ba ka jingsniew kane ka surok ka la neh da ki snem bad ka la buh jingeh ia ki nongleit nongwan na kane ka jaka.
U bah Juda u la ong ba ka jingdon ki thliew ki syar, ki kynruh kynram kaba la buh jingeh ym tang ia ki kali kiba iaid hynrei ka la buh jingma ruh ia ki briew kiba iaid lynti. U Rangbah shnong ka Mawpat ula ong ba kane ka surok na Lumshyiap sha Ishyrwat kaba la tip kum ka Evalyn Right Road ka la jot la kham slem bad na ka liang ka shnong mynshem snem, ka la leit ban kynduh ia ki bor sorkar bad ki la leh ia ka jingmaramot hynrei kam neh slem bad ka la jot biang wat haba ka tlang kam pat poi ruh ban shi snem.
U bah Juda u la ong ba ioh jingtip ba ka sorkar ka la pynkhreh ban shna kaba kham heh watla ka donkam shwa ia ka jingmaramot namar ba kan shim por ba ka jingshna pynheh bad kaba neh skhem kan kham shim por.
