Ka War Jaiñtia Students Union (WJSU) hynne ka sngi kala leit buh jingujor ha ki artylli ki tnat treikam sorkar ba kynthup ha MePDCL, Jowai bad sha ka tnat PWD(R), Jowai South Division, Jowai naka bynta ban pynsngew iaki jingeh ba ka thaiñ Amlarem ka mad lyngba ka tnat bording bad ruh lyngba ka jingjot palat pud kawei ka jingkieng iaid kali ha u surok Muktapur Borghat Roads kaba don haka thaiñ khappud bad ka ri Bangladesh. Lyngba ka jingujor shaka tnat sam bording bala aiti ha u Executive Engineer ka MePDCL, ka seng War Jaiñtia Students Union ka ong ba ka jinglip light ba khah khah ha ka thaiñ kaba ju neh da ki phew kynta ne da ki sngi khamtam ynda la poi ka por lyiur kala ktah shi katdei eh iaki paidbah ka thaiñ.
Ki sngewlyngngoh ruh iaka jingleh ka MePDCL namar kane ka iai jia barabor, bad tang shu slap ruh kala pynduh bording wat haba khlem don kano kano ka jingpynthut ka mariang iaki post electric ne ki line electric. La ong ruh ba kane kala pynartatien ia ki paidbah ka thaiñ kiba la buh jingkylli, hato kane ka tnat sam bording ka pynpoi bording shaka thaiñ da kaba pyndonkam da ki tiar bala kut por ???. Kumta na ka liang ka seng ka kyntu jur iaka MePDCL ban pynbiang bording lym kumta kan shim da kiwei pat ki lynti khnang ba ki paid ka thaiñ kin ioh jingmyntoi kumba ioh lang kiwei ki bynta jongka jylla, namar ba wat hapdeng ka jingpynduh light ba khah khah ruh ka jingsiew bording pat ka nangkiew arshah lai shah.
Ha ka jingiadei pat bad ka jingjot palat pud kawei ka jingkieng iaid kali ha u surok Muktapur Borghat Roads kaba don haka thaiñ khappud bad ka ri Bangladesh, ka seng lyngba ka jingthoh sha u Executive Engineer ka PWD(R),Jowai South Division,Jowai kala kyntu iaka tnat treikam ban shim khia namar ba ka buh jingma ia ki nongleit nongwan kiba pyndonkam ban iaid lyngba kane ka jingkieng. Ka seng kala ai copy ruh sha u MLA ka thaiñ, sha u myntri ka tnat PWD, bad dawa na u executive engineer ban maramot mardor ia katei ka jingkieng hapoh shitaiew naduh ka tarik ba ki ioh pdiang ia kane ka jingujor, lym kumta ka seng kaba don iaka jingkitkhlieh iaka thaiñ kam banse ban leh da ka kam kaba tyngeh naka bynta ban pynurlong iaki jingdonkam u paidbah.
