Ka skhim sam umbam umdih ha ka shnong Mihmyntdu, West Jaiñtia Hills District batip kum ka Mihmyntdu Water Supply Scheme, ba la sdang pyntrei naduh u bnai Lber 2023 ha ka mang tyngka ba 32 klur tyngka, ka la wanrah jingkyrmen ia ki paidbah nongshong shnong ka Mihmyntdu namar ba ka jingpyntrei ka la iaid sted bha bad kiba bun hi ki jingtrei la dep lut kynthup naduh ka dam, pump house, ki jaka pynkhuid um, ki jaka pyllang um ha ki kyntoit bapher bapher, ka jingpynpur ia ki pipe sha man ki thliew ïing bad kiwei. Kumta ha ka 09/11/24 u MLA ka 2-Jowai Constituency u Wailadmiki Shylla ula hiar leit jurip biang ia kane ka skhim naka tynrai bala tan iaka ha Mihmyntdu hi, bad ha kane ka juh ka sngi la sdang ban pyrshang pump ne tan iaka um shaki sedimentation tank ba la shna ha kane ka jaka.
Na ka liang u Wailadmiki Shylla haba kren u pynpaw ka jingkmen ban iohi ba ka jingjop kane ka skhim kala khynjoh shaka 95% bad ruh ka jingpyrshang pynpoi iaka um shaki sedimentation tank ha kane ka sngi kala long kaba iaid beit. Kaba dang sah mynta sa tang ban test iaka clear pumping water system bad ruh ban test iaki pipe pynpoi um sha man ki thliew ïing, nalor kiwei pat ki kam barit baria.
Halor ka jingiaid beit bad stet ka jingpyntrei ia kane ka skhim u pynpaw ka jingsngewnguh iaka jingiatreilang ryngkat naduh ki tnat sorkar, ki nongialam shnong bad ki paidbah jong ka shong Mihmyntdu, namar ba kane ka dei ka bynta jingmyntoi jong ka imlang sahlang. U ong ruh ba watla ka Jylla jong ngi dei kaba bun slap hynrei daka jingtrei shitom ka jingtrei ka iaid sted bha.
