Suki ka jingshna ia ka surok na Lad Mawreng sha Weiloi, sted tang ha por ba wan ka President: MLA Mawphlang

U MLA ka UDP na Mawphlang u bah Mathew Beyond Kurbah ula pynpaw ia ka jingsngew bynniaw ia ka jingsuki palat ka jingtrei ia ka surok na Lad Mawreng sha Weiloi.
Kane ka surok kaba don kumba 29 km eiei, ka la don ha ka jingpynheh la kham slem, hynrei ka jingsiang rong ka dang shu dep tang katto katne kilometer bad la buh ban pyndep ha 2025.
Haba kren mynta ka sngi, u bah Beyond ula ong ba ula iohi mynta ka sngi haba u iaid lynti, ia ka jingsuki ban pyntrei bad um shym la iohi ia ki nongtrei lait tang katto katne ngut.
U bah Beyond u la ong ba ia kane ka surok naduh Lad Mawreng haduh Weiloi, la shna pynsted tang ha ka por ba wan ka President ka ri .
“Ha ka por ba wan ka President ka surok la shna naduh na Lad Mawreng haduh Mawplang hynrei hadien kane la suki noh ka jingpyntrei ia ka surok, ” ong u MLA ka Mawphlang.
U la ong ba kane ka surok ka long kaba donkam haduh katta katta namar ba ka ai ia ka jingshakri ia ki paidbah ka East Khasi Hills, South West Khasi.
“Ki paidbah ki la iakynduh jingeh namar ka jingpyntrei ia kane ka surok ka slem, namar ba duna palat ki nongtrei ” u la ong.
U la ong ba lehse ka jingsuki ki kontraktor ban pyntrei shaid shaid ka dei namar bym pyllait pisa sha ki kontraktor bad ula kyntu ia ka sorkar ba kan shim khia ban pynsted ia ka jingpyntrei.
Na ka liang jong u ruh, un buddien khnang ba ki paidbah ba leit ba wan kin aram ha ka leit ka wan khamtam ia kiba pang kiba shitom.
“Nga kyntu ia ka sorkar bad ka tnad ba dei khmih ba kin pynsted ia ka kam khnang ba ki paidbah kin nym iakynduh jingeh than ha ka leit ka wan khamtam kiba pang ba shitom”, la ong u bah Beyond.
Ha kajuh ka por u la kyntu ruh ia ki paidbah ba kin iaishah namar ba ka sorkar kam dei ba ka thiah thai hynrei ka la ialeh ban pynsuk ia ki paidbah katkum ka jingdonkam mynta haba iadei bad ka surok.