Ka ‘eriong Remal ka la wanrah shibun ki jingpynjot ha baroh ar tylli ki Block hapoh South West Khasi Hills District, kata ka Mawkyrwat bad Ranikor C&RD Block ha kine ki ar sngi ha kaba ka la don ka jingtwa maw bad khyndew ha ki surok bad sahkut ka leit ka wan, rat ia ki dieng ki siej bad ki dieng ilektrik, pynjot ia 4 tylli ki skul bad palat 232 tylli ki iing ki sem bad ktah ruh ia kumba 1300 ngut ki nongshong shnong.
Katkum ka jingtip ba la ioh lum na ki bor sorkar, la iathuh ba haduh mynta ka janmiet, la ioh jingtip ba ki don haduh 4 tylli ki skul hapoh jong ka Ranikor C&RD Block, kiba la shah pynjot ha kane ka ‘eriong Remal da kaba lit noh ia ki tnum iing bad kumjuh ki jingker. Kine ki skul ba la shah pynjot ki kynthup ia ka Chitogre Govt. LP School, ka Bagli UP School, ka Mawphansaw UP School bad ka St. Peter UP School, Borsora.
Ki bor District ki la pyntip ruh ba ka South West Khasi Hills District kadei kawei napdeng ki District kiba la ioh bun eh u slap ha kane ka mynti ba mynta ha kaba ka la ioh haduh 218.0mm u slap tang hapoh kine ki 24 kynta, bad kumta ha ryngkat ka jingwan ka ‘eriong, ki la don haduh 201 tylli ki iing tang hapoh Ranikor Block kiba la shah pynjot bad ktah ruh ia 1106 ngut ki briew, katba hapoh Mawkyrwat C&RD Block pat ki don haduh 31 tylli ki iing kiba la shah pynjot bad ktah ia ruh ia 208 ngut ki briew. Ki shnong hapoh Mawkyrwat Block kiba la shah ktah ki kynthup ia ka Rangmaw, Nonglang, Mawkohphet Mawten, Laddommawiong, Sohsyniang, Diwian, Mawiong, Umdohlun bad ka shnong Lawblei, katba ha Ranikor pat ki shnong ba shah ktah ki kynthup ia ka Nongjri, Khonjoy bad Chibak.
Nalor kane, ka la don ruh ka jingtwa maw bad twa khyndew ha ar tylli ki jaka bad khang lynti ruh ia ka leit ka wan jong ki paitbah, kata, ha kawei ka jaka jong ka surok Mawkyrwat sha Rangblang bad ha kawei pat ka jaka jong ka surok na Mawkyrwat sha Ranikor.
Ha kaba iadei bad kine ki jingjia, na ka liang jong ka District Disaster Management Authority kaba la pynkhreh lypa ban tehlakam ia kum kine ki jingjia, ka la lah ban leit tuklar bad ai jingiarap ruh da ki tarpaulin sha kito ki longiing kiba la jur eh ka jingshah ktah bad kumjuh ruh ka la lah ban khad bad weng noh ia ka khyndew bad ki maw na surok.
