Ha ryngkat ka jingther u ‘lapbah, ka ‘eriong Remal ha kine ki 24 kynta ba la leit noh ka la ther tyngeh ia ka South West Khasi Hills District ha kaba lai ngut ki briew ki la mynsaw na ka jingshah pom pyrthat, bad kumjuh ruh ka Ranikor Community Health Centre (CHC), 17 tylli ki skul bad 29 tylli ki iing briew ki la shah pynjot bad pynjulor.
Ki tyllong khubor na ki ophisar sorkar ki iathuh ba lai ngut ki briew na ka shnong Rajaju hajan Borsora kaba hap hapoh ka Ranikor Civil Sub-Division ki la mynsaw jur hadien ba ki la ngat ha ka jingshah pom pyrthat kaba la jia hynnin ka 29 tarik ha ki por kumba 1 baje janmeit eiei. Ia ar ngut napdeng kine la pynkit noh sha Ranikor Civil Sub-Division na ka bynta ban ioh jingsumar, hynrei uwei pat u la kyntait ban leit shah sumar namar ba u kwah ban shah sumar lyngba ki jingsumar ba la hikai da ki riew tymmen pateng la pateng.
Na ka liang jong u Additional Deputy Commissioner (ADC) bad CEO ka District Disaster Management Authority, South Khasi Hills District, mynta ka janmiet u la pyntip ba kane ka eriong Remal ha kine ki 24 kynta ba la dep ka la ther tyngeh ia ka South West Khasi Hills ha kaba 29 tylli ki iing ki sem ki la jot bad ktah ruh ia 152 ngut ki briew ki briew ha ka shnong Pyndenlyngdoh kaba hap hapoh Mawkyrwat C&RD Block, ka Old Moilam, Lower Puksora, Panchering-B, Munnai bad ka shnong Mawhati, kiba hap hapoh ka Ranikor C&RD Block.
Nalor kane, la ioh jingtip ruh ba kane ka eriong ka la pynjot ruh ia ka Ranikor CHC hadien ba katto katne ki dieng ki la ban ia kane ka Hospital na ki katto katne ki jaka ba la tap da ka tin, bad kumjuh ruh ka jingpait jong ki iit bad ka jingkyllon jong u ding ilektrik hapoh katei ka Hospital namar ka jingjur palat jong u slap bad ka lyer.
Na ka liang jong u ADC u la pyntip ruh ba ki don haduh 15 tylli ki skul hapoh ka Ranikor C&RD Block bad 2 tylli ki skul hapoh ka Mawkyrwat C&RD Block, kiba la shah pynjot ha kane ka eriong ha kine ki 24 kynta ba la dep. Kine ki skul ki kynthup ia ka Arland LP School, Nongmalang RCLP School, Nongmalang RCUP School, St. John RCLP School, Nongnah RCLP School, Nongnah Deficit UP School, Nongnah Secondary School, Khatphra SSA UP School, Nongbah Jynrin LP School, Chitogre SSA UP School, Nongmluh COG UP School, RCLP School Phlangdiloin, Saw Shnong UP School Mawphansaw bad ka St. Peter UP School Borsora, kiba hap hapoh ka Ranikor C&RD Block, katba ha Mawkyrwat C&RD Block pat ki skul ba la shah pynjot ki long ka Nonglang RCLP School bad ka Shaidshaid Umoid LP School.
Ha kaba iadei bad kine ki jingjia, na ka liang jong ka District Disaster Management Authority ka la lum jingtip halor kine kiei kiei, ka la ai jingiarap ha kaba iadei bad ka jingsumar bad kumjuh ruh ia kiwei pat ki jingdonkam.
