T.10 hajar ka kuna ia kiba niah kali buaid

Ki pulit ka East Khasi Hills kin khynra naphang ia ki nongniah thuk thuk ba la buaid khnang ban lait na ki jingjia ba sngewsih.

Katkum ka jingiakhuh u Superintendent of Police, City u Bah Vivek Syiem ula pyntip namar ba la wan ka Aiom Lehkmen Khristmas, ka long kaba kongsan ban pynthikna ba ka jingniah ia ki kali ka dei ban long kaba shngaiñ ban pynduna ia ka jingjia aksiden kaba wanrah ia ki jingjia ba sngewsih.

U ong ki pulit Shillong Traffic Police kin pynlong mardor ia ka jingkhynra ha kylleng ki jaka ka nongbah Shillong, Surok Bypass, Surokbah bad ki surok shnong bad ka STP kan pynleit jingmut bun ha kaba iadei bad ki nongniah kiba la buaid bad ka jingniah kali khlem akor kaba long pyrshah ia ka Motor Vehicles Act.

U la bynrap lada lap ia kiba niah kali buaid yn pynshitom katkum ka kyndon 185 jong ka MV Act ryngkat bad ka daiñ kuna T.10,000 ne set along haduh 6 bnai lane ban pynsajia baroh ar ia ki nongpynkheiñ aiñ.

U la kyntu ia ki nongniah thuk thuk ba kin niah don akor bad kim dei ban dih khnang ba kan long ka jingshngain ia kiwei ruh.