Ka jingiai bteng ki paidbah nongleit nongwan ban bret pathar ia ki plastik bad ia kiwei kiwei ki jaboh harud ka surok bah kaba hap hapoh u pud u sam jong ka shnong Mawshut bad ka jingiadih kyiad ki briew hapoh kali harud kane ka surok haka por mynmiet kaba la lam ruh sha ka jingbret pathar iaki bilor kyiad harud ka surok, ka la pynlong ia ka Seng Samla Shnong Mawshut bad ia ka Shnong Mawshut ban mih sha khmat ban kyrpad iaki nongleit nongwan ba kim dei shuh ban bret pathar iaki jaboh bad ban ieng dih kyiad harud kane ka surok bad ha kajuh ka por kila maham ruh ban pynshitom da kaba tyngeh lada kin lap nangne sha khmat iaki briew kiba leh ia kine ki kam khlem akor.
Ki Nongialam jong ka seng samla bad ka shnong Mawshut ha ka 19 tarik u Risaw 2024 haba ai jingkren hadien ba ki la dep ban pynkhuid bad tam iaki jaboh kiba don harud kane ka surok, kila iathuh ba nangne shakhmat ka shnong ha ryngkat ka seng samla kin pynlong iaka jingpeitngor bad lada kin lap ia kino kino kiba pynkhein iaka jingmana kin pynngat iaki haka jingpynshitom da kaba dain kuna 10 hajar tyngka.
