Ka tnat Directorate of Sports & Youth Affairs jong ka Sorkar Jylla lyngba ki bor pyniaid District jong ka South West Khasi Hills District mynta ka sngi ka la aiti ia ka cheque ba T.2.20 lak ia ka Mei-ieit Kmoinlang Wahlang, ka nongiamareh thong ba pawnam hapoh ka Ri India, kaba dei na ka shnong Sngimawlein, South West Khasi Hills District, ban leit ia shim bynta sha ka lympung ialehkai 13th Pan Pacific Masters Games 2024 ka ban sa long ha Gold Coast, Australia ha u Naiwieng, 2024.
Na ka liang jong ki bor District lyngba ka ophis jong u Deputy Commissioner ka la ai jingiarap ruh ia u Bah Beningstar Lyngkhoi, uba dei u Coach uban sa leit synranlang lang ia ka Mei-ieit Kmoin sha ka Ri Australia, lyngba ka skhim Chief Minister Youth Development Scheme (CMYDS). Haba ai jingkren, u Bah Lyngwa u la pynpaw ka jingsngewkmen kaba khraw halor ka jingshahkhot jong ka Mei-ieit Kmoin ha kane ka lympung iamareh thong kaba heh, bad u la ong ruh ba u dap da ka jingsngew sarong na ka bynta ka Mei-ieit kaba dei ka khlur ialehkai kaba wanrah burom ia ka jylla bad ia ka district baroh kawei.
Na ka liang jong u District Sports Officer ka South West Khasi Hills District, u Bah Damang Syngkon u la ong ba u dap da ka jingsngewkmen kaba khraw ba ka tnat Directorate of Sports & Youth Affairs ka la ioh ban ai ia ka check lyngba ka ophis jong u ha kaba kam dei shuh kaba rit, hynrei u la ong pat ba ka Mei-ieit ka dang donkam shibun ki jingiarap ha kane ka jingleit ban iashimbynta jong ka ha katei ka lympung.
