Ban nang kyntiew ia ka jingnang jingstad ha ki thaiñ kyndong hapoh Ri Bhoi District, u nongmihkhmat ka Nongpoh Konstituensi u Bah Mayral Born Syiem, u la leit ban ia kynduh ia ki nonghikai bad khynnah skul ka Raid Hoppati Christian Secondary School ha ka shnong Kharpati bad ban aiti ruh ia ka work order kaba 2 lak tyngka ban tei ia ka kynroh skul ia kaba la mang na ka skhim SRWP. Ia ka work order u MLA u la aiti ha u Principal ka school u Bah Nirmal Terang ha kaba la sakhilang ruh da ki nonghikai lem bad ki khynnah skul. Haba kren ha kane ka prokram, u Bah Mayral Born Syiem u la pynpaw ia ka jingkmen ban ioh ia donlang bad ki nonghikai lem bad ki khynnah skul ha ki thaiñ kyndong kum kawei ka thong ban ai mynsiem bad ban pynshlur ia ki ban kyntiew ia ka jingnang jingstad bad ban pynduh ruh ia ki jingmlien kiba sniew.
“Kum u nongmihkhmat paidbah, nga shim ia ka jingkitkhlieh ban ialap bad ban pynshlur ia ki samla pule ba kin minot thop ia ki jingpule jong ki khnang ba kin lah ban long briew man ha ka jingim ka jong ki bad ruh ba kin lait na ki kynjri jong ki jingmlien ba sniew kum u drug bad kiwei kiba lah ban pynjot kylla ia ka lawei ba phyrnai ka jong ki”, ong u Bah Mayral Born Syiem. Shuh shuh ruh, u la ai mynsiem ia ki nonghikai bad ki nongpyniaid skul ba kin nang iai treishitom na ka por sha ka por ban ai ia ka jinghikai kaba paka ban pynskhem ia u paia jingnang jingstad ia ki khynnah pule, u la bynrap ruh, ka long kaba donkam ia ki khynnah ban wad jingtip kaba bniah halor ka National Education Policy bad kumjuh iaka CUET Exam khnang ba kin long kiba pynkhreh ynda ki la pass na skul bad don jingthmu ban bteng iaki jingpule shakhmat.
U la tyrwa ruh ia u Principal bad iaki Nonghikai Skul ba lada ki khynnah skul ki donkam ban ioh jingtip shuh shuh halor ka NEP bad ka CUET naka liang jong u kum u Nongmihkhmat un sa pynlong iaka Program kaba kyrpang hakaba yn sa wan daki riew shemphang ban batai bniah halor kitei ki bynta.
