Shisngi hadien ba u Myntri ka tnat Housing ula pynbna ba la thung da ka jingtohkit Departmental Inquiry halor ka jingkynnoh sam tin sop iing tad dor, ka Hynniewtrep Youth Council (HYC) hynne ka sngi ka la ujor sha ka Meghalaya Lokayukta pyrshah ia u Director ka Housing.
Kane ka jingwan ujor ka HYC ka dei namar ka jingbym hun ia ka Departmental Inquiry bad ka jubab u Myntri ka tnat Housing u Marcuise N Marak uba la kam ruh ba ka jingthied tin sop iing ka dei katkum ki kyndon jong ka Sorkar Jylla.
Haba kren sha ki lad pathai khubor hadien ba la wan aiti ia ka jingujor sha u Secretary ka Meghalaya Lokayukta u Bah R. Rapthap, u President ka HYC u Bah Roykupar Synrem ula iathuh ba ka jingujor ka dei katkum ka Section 20 jong ka Meghalaya Lokayukta Act 2014.
U Bah Roykupar ula iathuh ba ka jingujor ka long pyrshah ia ka Director ka tnat Housing namar ka dei ka nongthied ia kine ki tin na ka Company ka Jylla West Bengal ha ka jinglut kaba ym duna ia ka T.20 klur ban pynpoi sha man ki CRD Block jong ka Jylla.
Ula kynnoh ba ka jingpynbna u Myntri ka tnat Housing ba la thung ia ka jingtohkit ban khlieh da u Joint Secretary ka dei tang ka jingpyndep rukom.
“Namar ba ka seng kam hun ia ka jubab u Myntri ka tnat Housing, nga kum u jingujor nga la wan ujor pyrshah ia ka Director ka tnat Housing ha ka Meghalaya Lokayukta namar baroh ki tip ba ka Lokayukta ka don ia ka bor ban tohkit ia ki jingkynnoh bamsap pyrshah ia ki nongtrei ne ki ophisar Sorkar” la ong u Bah Roykupar.
U Bah Roykupar ula ong ba ka Meghalaya Lokayukta nalor ba ka don iaka bor, ka don ruh da ka kynhun tohkit ia kino kino ki jingkynnoh bamsap, khamtam kiba ia dei bad ka jingpyrsywa kai ka pisa paidbah.
Nalor kane ka HYC ka la dawa ruh ban pynphai biang ia ki tin ba la dep pynpoi sha Jirang, Shella bad Nongstoin C&RD Block namar ki dei kiba stang palat bad kim long ban sop ia ki iing.
“Haka jingujor, ngi la dawa ba dei ban pynshitom ia ki ba don bynta ban pynsyrwa kai ia ka pisa u paidbah namar katkum ka Tender jong ka jingthied ia ki tin sop iing, ka poi ym duna ia ka T.20 klur bad ki tin ki dei ban don ka jingrben 0.45 hynrei ka seng ka la ioh ka jingujor ba ki tin ki long tang 0.25 ka jingrben” ula ong.
