Ka Sorkar Meghalaya ka la rai ban thoh sha ka tnat Directorate General of Civil Aviation (DCA) ka Sorkar Pdeng ban pyllait ia ka kad liengsuin Umroi (Airport) na ki katto katne ki kyndon ba ia dei bad ka jingpynheh ia ka kad Liengsuin ha Jylla. Ia kane la pyntip da u Symbud Myntri Rangbah ka Tnad Transport u Bah Sniawbhalang Dhar. Ha shuwa kane u Bah Sniawbhalang ula lum ia ka jingialang bad ki Ophisar ka tnat Airport Authority of India (AAI), ka Sorkar Pdeng, MLA ka Umroi, u Bah Damanbait Lamare, u Chief Secretary ka jylla u Bah DP Wahlang, u Deputy Commissioner ka Ri Bhoi, u Abhilash Baranwal bad ki Heh Ophisar ka Tnad Transport ka Sorkar Jylla.
Haba kren sha ki lad pathai khubor u Bah Sniawbhalang, ula iathuh ha ka 25 tarik mynta u bnai, ka Kynhun Myntri Sorkar kan iathir halor ki jingtyrwa ban pynheh ia ka Umroi Airport bad ban thied jaka. “Ngi la ioh pdiang ia ka kaiphod kaba ar na ka Airport Authority of India (AAI) kaba pynpaw ba ka lynti ka don ban pyniar ia ka Runway jong ka Airport hynrei ki don pat katto katne ki jingwit, kiba hap ban iakren bad ka Sorkar Pdeng” la ong u Bah Sniawbhalang. U Bah Sniawbhalang ula ong, ki kam ban pynheh ia ka Airport kin sdang noh shen lada ka Sorkar Pdeng ka pyllait noh ia ka Umroi Airport na ki katto katne ki kyndon pynheh kad lengsuin.
Ula iathuh ka Sorkar Jylla ka donkam ban thied jaka sa 22 akar na ka bynta ban pynheh ia ka project ha kaba 16 akar kan long ia ki bynta ka jingshngain bad 6 akar ki jaka pynieng ia ki liengsuin ba heh. “Donkam ban pynjrong lane pyniar sa 900 meter ia ka Runway ba pyndap ia ka jingdonkam kaba 2400 meter kaba biang na ka bynta ki liengsuin kiba kham heh” u la ong.Haba kylli halor ka jinglut ban pynheh ia ka Umroi Airport, u Symbud Myntri Rangbah ula ong “Katkum ka plan, kumba T.500 klur yn pynlut da ka AAI bad ka jingthied jaka kan dei ban pynlut da ka Sorkar Jylla”.
