Tang ki nongrep ka thaiñ ki lah ban pyndonkam GI Tag : Ampareen

Ka Myntri kaba khmih ia ka rep ka riang ka Kong  Ampareen Lyngdoh, kala pyntip ha ka Dorbar Mang Tyngka jongka iingdorbar thawain ka jylla, ba ka jingai iaka Geographical Indication (GI) Tag ne ka shap ia u Shynrai Lakadong ka long ka jingiada ia ka jinglong tynrai jong ka rukom pynmih bad ia ka jingnang jingtip khnang  ban pynthikna ba tang ki nongrep bad ki nongthung kiba hapoh jong katei ka thaiñ ne Geographical Area, kiba pyndonkam ia ka buit tynrai ki lah ban pyndonkam ia ka GI Tag. Ka Kong Ampareen  Lyngdoh haba jubab ia ka Zero Hour Notice jong u MLA ka VPP na Nongkrem u Bah Ardent M Basaiawmoit kala pynshai ba katei ka GI . Tag ka long ka lad kyrpang kaba ki nongrep bad ki nongdie kin lah ban pyniaid ìew bha bad kin lah ban pyniapher ia u mar jongki ha ki iew ki hat bad kane kan iarap ruh  ia ki ban die ha ka dor kaba heh bad ba ka jingdawa ruh kan long kaba jur bha. Kala ong ba ka Registrar jongka GI ha Chennai kala pynmih ia ka jingpynbna ba la ai ia u GI Tag nombar 741 ia u shynrai Lakadong na East Jaintia Hills bad West Jaintia Hills District ha ka 29 tarik u Naiwieng 2023 bad kane kala urlong hadien ba la pynlong bunsien ia ka jingsngap ia ki jingpynsngew bad ia ki jingpynshai.

Ka Kong Ampareen kala iathuh ba ka Lakadong Turmeric Cooperative Union Limited, Jowai kala phah ia ka aplikeshon lyngba ka jingkyrshan jongka Directorate of Horticulture bad ka Department of Agriculture & Farmers Welfare. Nalor kane, kala pyntip ba bunjait ki nongthied kila thied ia u symbai Lakadong ban thung bad ban pynmih ia u ha ki jylla jongki bad kumjuh ban die ia u kum u shynrai Lakadong kumta kane kala pynklumar ia ki nongthied bad kala pynthoh bria ruh iaka dur, ka jingbha Quality bad iaka jinglong kyrpang jongu shynrai Lakadong bad kan pynduh duhnong bha ka ioh ka kot jong ki nongrep Lakadong. Kala ong ba da kaba shimkhia ia kane ka mat, kunta la pynmih ia ka jingpynbna paidbah bad la maham tyngeh ban die ia u symbai Lakadong na ka bynta ban pynmih ia u shabar jongka rilum Jaintia.

Ka Kong Ampareen kala ong ba lyngba kine ki jingtuklar bad jingshimkhia kala iarap shibun ban kyntiew ia ka jingrep ia u Lakadong da 13 shah ia ka jingdon ki nongrep ha ka kam rep Lakadong bad ka iaid ryngkat lang bad ka jingangnud jong ki nongrep ban kyntiew arshah ia ka ioh ka kot ka jongki bad ba ki nongrep kin buh dor hi ia u shynrai Lakadong. Kala ong ba ka sorkar jylla kan ialeh ban kyntiew bad pyniaid iew ia u shynrai Lakadong bad kan shimkhia ruh ha kaban pynioh GI Tag ia kiwei kiwei ki mar kiba pynmih hapoh ka jylla.