Ki samla pule ka skulbah North Eastern Hills University (NEHU) Shillong hynne ka sngi ki la thang ia ka tyngshop jong u Vice Chancellor (VC) Prof PS Shukla, Registrar, Deputy Registrar (Academics), Officer on Special Duty (Director, College Development Council) bad u Guest House In-charge. Ia kine ki tyngshop la thang ha khmat ka khyrdop ka ophis treikam Administrative Block ha ka jingiadonlang baroh ki samla pule ka NEHU Shillong campus. Ha shuwa kane dang step, ki samla pule ki la pyntreikam ia ka jingkhang khyrdep (Total Lockdown) ia ka skulbah NEHU ban khang tala ia ki khyrdop (Gate). Ki samla pule ki la khang khyrdep ia ki khyrdop (Gate) jong ka skulbah NEHU Shillong naduh ka Gate 2 haduh ka Gate 5 ban khang iano iano ban rung shapoh ka jaka pule khlem ka jingbit. La sakhi ba ki dkhot ka KSU NEHU Unit bad ki katto katne ki samla pule ka NEHU kiba don hapdeng ka jingshah thngan khlem buh por ki la shah ai Drip ha ki nongtrei ka koit ka khiah. Ka NEHU Shillong Campus ka la khang khyrdep ha ka sngi kaba ar hadien ba ki samla pule jong ka NEHU hapoh ka lama jong ka NEHU Students Union (NEHUSU) ba la kyrshan da ka KSU-NEHU Unit, ki la shim ia ka rai ban pynlong ia ka jingshah thngan khlem pud sngi bad ban pynlong ia ka jingkhang dam (Total Lockdown) ia ka skulbah.
Hapdeng ka jingiakhih, u Vice Chancellor ka NEHU u Prof PS Shukla ula mih ban iakynduh ia ki samla pule bad ka jingiakynduh ka la mih ka thma ktien ba jur hapdeng ki samla bad u VC. “Ngim pdiang ia ka jingpynshisha jong phi ha ki lad pathai khubor. Ngim pdiang ia kane. Ngi kwah ba phin hiar shuki noh mardor na ka kam VC” la ong ki samla pule kiba iakhih hakhmat ka khyrdop Administrative Block. “Ngim sngewtynnad ka jingpynshai u VC halor ki jingdawa jong ngi. Ngi kwah ba u VC un hiar shuki da ka jingsngewrit bad ngi kwah ba u dei ban weng kam mardor ia ki ophisar ba ula thung kam” la ong u General Secretary ka NEHUSU u Toniho S Kharsati. U samla Toniho ula ong, ba ki samla pule kin ym kynran dien na kine ki jingiakhih bad kin bteng ia ka jingiakhih tad haduh ban pynurlong ia ki jingdawa jong ki. Ha kajuh ka por, u Vice Chancellor (VC) ka skulbah North Eastern Hills University (NEHU)u Prof PS Shukla u la pyntip ba un khot ia ka jingïalang jong ka Executive Council ban thaw kynhun tohkit (Enquiry Committee) hapoh ka 11 tarik Naiwieng bad hadien ka jingwad bniah bad ka jingtohkit, ka Committee kan sa shim ki sienjam.
Ka jingthaw ia ka Committee ka long ban tohkit halor ki mat jingdawa ki samla pule ka skulbah NEHU kata ban weng kam ïa u Registrar bad ïa u Deputy Registrar. “Ka University ka don katto katne ki kyndon bad ki kyndon kiba la buh ban ia dei bad kum kine ki jingeh. Kum u Vice- Chancellor, ka kamram jong nga ka long ban iada ia kita ki kyndon bad ki jingbthah katkum ka riti synshar. Namar kata ngan khot da ka jingïalang Executive Council” la ong u VC. U Vice-Chancellor u la pyntip ruh ba hapoh 30 tarik Naiwieng, un thung noh Pro-Vice-Chancellors naka bynta ka NEHU Shillong bad Tura Campus.“Nga kyrpad bad kyntu ia phi ba phin sngewbha ban weng noh ia ka jingïakhih khnang ba ka jinglong jingman kan wanphai biang hapoh ka University” la ong u VC lyngba ka shithi sha u President ka NEHU Student Union.
