Thang ki sengbhalang ia ka CAA ha Ri Bhoi, pyrshah ban pyntreikam ha Meghalaya

Ha ka jingïalang ba la pynlong da ka Khasi Student Union, North Khasi Hills District Unit kaba la long ha ïew-mawlong, Nongpoh, ki nongialam Seng Bhalang bapher bapher ki la thang syndon ia ki kyndon Aiñ Citizenship Amendment Act haduh ban da iingkhong khait.  Ïa kane ka jingialang la pynlong da ka KSU-NKHD ban pynpaw ïa ka jingpyrshah bad da lei lei ngin nym pdiang ïa ka jingthmu ka sorkar pdeng ban pynlong aiñ ïa ka CAA hapoh ka jylla Meghalaya.

Ha ka jingialang la wan ruh ban ïa snohkti lang da ki nongialam Seng bhalang bapher bapher, ba kynthup ïa u bah Ferdinald Kharkamni, President KSU-NKHD, Bah James Mawphniang, Secretary KSU-NKHD, Markus Marten, President ka HNYF, Bah Ricky Majaw, President HNYF Nongpoh Circle, ki nongialam Shnong lem bad kiwei ki riew Rangbah ka thaiñ. Ha ba kren ha ka jingialang ki nongialam Seng Bhalang ki la pynshai paidbah halor ka jingktah lada pynlong aiñ ia ka CAA hapoh ka jylla meghalaya. Ki la ïathuh ruh ba lada kane ka aiñ kan treikam hapoh ka jylla Meghalaya ki Briew naduh na Bangladesh, Pakistan, Afghanistan bad kiwei ki paid na kiwei ki ri kin sa ioh ban wan buhai shnong sha ka Ri jong ngi.

Ki la ong ruh ba lada ka Sorkar jylla kan ai lad ïa kane ka aiñ ban pyntreikam ki briew ba wan ba nabar ka Ri kin sa ïoh lad ban bsuh hapoh ka jylla bad kin sa knieh wat ïa ka jinglong trai jong ngi ha la ka jylla bad ka jylla Meghalaya kan ym don wait Don stieh ban iada na ka jingwan rung kyrthlep ki briew, hynrei dei tang ka ILP kaba lah ban ïada ïa ka jaitbynriew hynrei haduh mynta ngim pat lah ïoh ïa ka. Ki Nongialam ka KSU ki pyrta ruh ba da lei lei kin nym ai lad ban pyntreikam ïa ka CAA ha jylla Meghalaya bad ki la dawa ba ka sorkar pdeng ka dei ban pyllait ïa ka jylla na ka Aiñ CAA bad ka dei ban pyntreikam da ka ILP na bynta ka shongsuk shongsain bad ban iada ia ka jaidbynriew.