Hadien ba la mih ki kynrum kynram haba ia dei bad ka krem Mawjymbuin kaba don ha Mawsynram, ka Iing Kashari jong ka Meghalaya High Court ka la thaw ia ka Committee na bynta ban wad ia ki lad ki lynti ban pynbeit ia ki jingeh halor katei ka krem. Ka Iing Kashari ha ka hukum kaba la pynmih ha ka 14 tarik Nailar 2024 lyngba u nongbishar u Justice HS Thangkhiew ka la bthah ia ka Deputy Commissioner ka East Khasi Hills ban phah ia ki kyrteng jong ki briew bad ki kynhun ban don ha kane ka Committee ban bishar ia kane ka kam khnang ban poi sha ka lynti ka jingpynbeit ka ban pdiang da baroh. Ka Kashari ka la ai por ia ka Deputy Commissioner ba kan pyndep ia kane ka kam hapoh shi taiew, kaba mut ba ka dei ban phah ia ki kyrteng ban don ha kane ka Committee ha ka 22 tarik mynta u Nailar 2024, ba kan shim bishar biang. Ka Kashari ka sngew ka long kaba donkam ban thaw ia ka Committee ban peit ia kane ka kam bad kumno ban pyniaid ia kane ka krem, da kaba buh ha ka jingmut ba ka dei ka jaka kyntang, ka jingiada ia ka mariang bad kaba ia dei bad ka jinglehniam.
Ka High Court ka la maham ruh ba ka la ioh jingtip ba katto katne ki briew bad ki kynhun ki la pynphriang ia ki khubor lamler bad ka jingbyrngem, ha kaba ia dei bad ka jingpyndonkam ia ka jaka lehniam. Halor kane, ka la pyntip paidbah ba lada dang don kiba pynphriang ia ka khubor lamler nangne shakhmat, kan shim kam pyrshah ia ki. Khnang ban lait na kano kano ka jingjia bym sngew tynnad, ka Kashari ka la bthah ia u Superintendent of Police (SP), ka East Khasi Hills District ba un bthah ia u Officer In-charge, ka Mawsynram ban buh pulit ban pahara ha katei ka jaka. Ha kajuh ka por, ka Kashari ka la pynpaw ba ka long kaba sngewsih ba khlem lah ban poi sha ka lynti ka jingpynbeit ban ailad ia ka kynhun ban iaid yatra kaba long kyntang ia ki ha ka jingngeit jong ki. Ka Kashari ka la shim ia ka jingsngewkhia kaba la wanrah ka kynhun Yatra ha kaba ki treh ban pynsangeh shwa ia ka jingiaid Yatra ban ap ia ka rai halor kane ka kam.
Ha ka jingbishar ha ka 14 tarik Nailar 2024, u bah Hiam Rapsang, u Rangbah Shnong ka Mawsynram ula ai ia ka jingai jingmut ha ka Kashari ba ki pdiang bad ki tip ia ka jingshisha ba ka Krem Mawjymbuin ka dei ka jaka kaba khring ia ki nongwankai, nalor ba ka dei ka jaka kyntang kaba la ngeit da kiba bun ki nongmane na ki jingngeit bapher bapher, hynrei ula kyrpad ba khnang ban poi sha ka jingiasngewthuh jingmut bad ban shim ia ki lynti kiba thikna ban shah ia ka jingwan jngoh da ka lynti kaba suk ha katei ka krem Mawjymbuin, ka donkam ia ka jingiasyllok ka jingiamir jingmut. U S.Jindal u nongiasaid ia ka kynhun Yatra, ula ong namar ka jingkhim ka por ba ka lah ban shim por ban ia pynbeit ia mynta u snem, leh se ki lah ban pynsangeh shwa ia ka jingiaid Yatra ban ap ia ka rai halor kane.
Lah ban kdew ba ka kynhun Yatra ka la sangeh noh shwa ia ka jingthmu ban iaid Yatra sha ka krem Mawjymbuin ha ka 11 tarik Nailar 2024, hadien ba kane ka kam ka dang don ha ka kashari. Ka kynhun Yatra ka la kiew sha Kashari hadien ba ka dorbar shnong Mawsynram ka la pyrshah jur ia ka jingthmu ban pynlong ia ka jingleh niam da ki riewngeit Hindu ha katei ka krem. Ki riewngeit Hindu ki la pynlong ia ka jingiaid Yatra sha katei ka krem naduh u snem 2011 hynrei ha kane ka kynti, ki la kynduh mawsiang na ka jingmih ka jingpyrshah ka shnong.
