Ka Deputy commissioner jong ka food safety (technical) ka Dr Wandamika Lyngdoh, ka la ong ba ka tnad Food Safety ka dei kaba tes ia baroh ki jait jingbam ha ka jylla Meghalaya.
Haba kren sha ki lad pathai khubor, ka kong Wandamika ka la ong ba baroh ki briew ha shwa ba kin bam ia kino kino ki jingbam , ki dei ban tip ki wan na ei ki jingbam bad ki dei kiba long kumno, khnang ban kiar na ki jingjia ba sniew.
Katkum ka jingiathuh ka kong Wandamika ha ka Food Testing, la tes ia ki jingbam kynthup naduh u khaw, ki jhur, ka um, u soh, ka doh bad ki jingbam ba song kum ki chips ki candy bad kiwei de.
Ka la ong ba baroh ki Hotels bad ki dukan die jingbam kidei ban rejister ia ki dukan jong ki ha shwa ba kin die ia ki jingbam.
Kino kino kiba lap ba ki Hotels bad ki Restaurant ki bym pat rejistar, ki dei ban ujor sha Commissionerate of Food Safety bad ka tnad kan sa leh ia kaba donkam bad pynshitom katkum ka ain jong ka Food Safety Standard Act,2006, ong ka Deputy Commissioner of Food Safety.
Ka la bynrap, “ Ki Restaurant bad ki hotels kidei ban ioh ia Registration jong ka FSSAI bad hapoh une u snem ki restaurant kidei ban ioh ia ka kyrdan jingkhuid ne ka Hygiene Rating.”
Ka kong Wandamika ka la ong ba haduh mynta ki Hotels kiba la ioh ia ka Hygiene Rating kidei tang ka Marriotte, Vivanta, City Hut Dhaba. Ka la bynrap, kaba sngewthynnad mynta ka long ba wat ki dukan Khasi kiba sdang ia ka kam die bam, ki la pynbiang ia ki jingdonkam baroh.
“Ha ka por ba rejister kawei ka kyndon kaba donkam eh kaba ka Food Safety ka buh, ka long ba ki dei ban tes ia ki jingbam jong ki. Ka kynhun Enforcement na ka tnad, ki ju leit jurip man ka por ia ki dukan,” ong ka kong Wandamika haba kren ha ka jingrakhe ia ka World Food Safety Day ha ka 6 tarik Jylliew ha Pasteur, Lawmali.
Ka Deputy Commissioner jong ka food safety, ka la ong watla ki trai dukan ki la rejistar ia ki dukan hynrei ynda la tes ia ki jingbam bad lada lap ba kam biang, kin nym ioh ia ka FSSAI lisen.
“ Na ka tnad nyngkong eh ngi pynshlur ia ki dukan ba nyngkong eh kidei ban test ia ki um khamtam ki dukan ha ki Restaurant,” ka la ong.
Ka kong Wandamika, ka ong ba katkum ka Food Safety Act, baroh ki dukan Restaurant, kidei ban don ia ka FSSAI lisen bad ka tnad ai ia ka Hygene Rating.
“Bun ki briew ki snngew ba ym donkam ban rejister ban ioh ia ka lisen. Ka la ai nuksa ba lada ki briew kiba leit bam ha kano kano ka dukan bad lada ki iohpang, kitei ki dukan ki hap ban khang mardor ia ka dukan namar kane ka long katkum ka Food Safety Standard Act,2006 bad kino kino kiba pynkhein ia ka Ain kin shah dain kuna ruh,” ong ka kong Wandamika.
Haba iadei bad ki Hospital, ka kong Wandamika ka la ong ba ki Hospital ki kham shimkhia ban test ia ka um man ka por bad shen baroh ki hospital ha Shillong ki ladei ban rejister hapoh u Nailar,2024.
