Ka Myntri ka koit ka khiah ka Dr M Ampareen Lyngdoh hynne ka sngi, ka la plie ia ka X-Ray Unit jong ka Smit Primary Health Centre na ka bynta ban lah ban ai ka jingshakri ia ki nongpang ha katei ka thaiñ.
Ha kane ka jingplie ia ka X-Ray Unit la iadonlang u Commissioner & Secretary ka koit ka khiah u Dr Joram Beda, Director ka Health Service (MI) Dr F. V Kharshiing, ki Doctor ki Nurse, ki nongialam shnong bad kiwei kiwei.
Ka Kong Ampareen Lyngdoh kala ong ba ka jingwan ka jongka kam dei eh tang ban plie iaka X-Ray Unit hynrei ban peit ruh ia ka jingiaid shakhmat jong ki kam ha kane ka PHC.
Ha ki bnai kiba la dep, ka Kong Ampareen kala leit jurip ia katei ka thaiñ bad kala ioh pdiang ia ka jingkyrpad na ka Dorbar Shnong ban kyntiew kyrdan noh ia ka PHC sha ka CHC, khamtam haba ka jaka ruh kala don lypa bad kumta la aiti ha u Engineer ba yn shimkhia ia kane ka kam.
Ka Kong Ampareen ka la ong, ba ka long kaba donkam ban don ia ka jingiadei kaba iajan hapdeng ki ophisar bad ki paidbah khnang ba ka jingthmu kan poi sha jingjop bad kala kyntu ruh ia ki ophisar jong ka tnad ba kin buddien iaka jingtyrwa jong ka Dorbar.
“Ngi don hangne ban shakri ia ki paidbah, kumta lada dei mano mano ruh kiba pang, ka thong kaba hakhmat hi ka long ban pynthikna ban iada ia ka jingim ka jongki” ong ka Kong Ampareen.
Kala kyntu ia ki ophisar bad ki doctor ba kin iatreilang bad ka dorbar shnong na ka bynta ka jingiaid beit iaid ryntih jong ka PHC.
