U Member of Parliament (MP) ba thymmai sha Lok Sabha na ka Shillong Parliamentary u Dr Ricky AJ Syngkon ula kular ban pynurlong ia ki jingangnud jong ki paidbah ka Ri-lum Khasi-Jaintia.
Ia kine ki kular u Dr Ricky ula kren hadien ka jingpdiang ia ka syrnod ba jop ia ka ilekshon MP 2024 na u Returning Officer (RO).
Haba kren sha ki lad pathai khubor u Dr Ricky ula ong, ba ki paidbah ki la ngiah bad kdang ia ka rukom leh politik ki nongialam hapoh ka Jylla Meghalaya.
“Ki paidbah ki kwah ia ka jingkylla bad ka Result hynne ka sngi ka dei ka jingthrang ba la slem bha jong ki paidbah. Kumta ngi phai shakhmat ban pynurlong ia kine ki jingphoh sniew bad jingangnud jong ki paidbah ka Jylla” la ong u Dr Ricky.
U Dr Ricky ula pyntip ruh ba ula don ia ka jingkut jingmut ba skhem halor ka thong jong ka VPP ban pynim, pynwan dur biang kumba ju long bad pynkylla dur thymmai ia ka Meghalaya.
“Ngi don 24 tylli ki mat ialap ilekshon bad baroh kine ki mat ki dei kiba kongsan hakhmat jong ka party. Kum ka party ngin sa iashong lang bad ngin sa pynbeit ia kiei kiba donkam kham hakhmat eh. Kum kiei ki ishu ba ngin sa shim, ngin sa pyntip sha phi hadien ba ka party ka la shong bad shim ia ka rai” ula ong.
Ula ong, ka party shen kan shong jingialang ban shim rai na bynta ban iatreilang bad ki seng seng sain pyrthei ha New Delhi.
