Ka kyrtong jong ka Trinamool Congress (TMC) ka Sadhiarani M Sangma bad u kyrtong khlem seng u Jerry A Sangma hynne ka sngi kila leit thep kyrteng ban iakhun ia ka elekshon MLA shiteng samoi na Gambegre Constituency. Ka Sadhiarani M Sangma kadei ka MDC jong ka GHADC bad ka kurim jongu myntri sorkar barim ka jylla u Zenith M Sangma. U Sengkrabirth Marak ula thep kyrteng kum u kyrtong khlem seng hynin ka sngi bad u Jerry ula thep kyrteng hynne ka sngi. Ka National People’s Party (NPP) kan pynieng da ka Dr Mehtab Chandi A. Sangma, ka kurim jong u Myntri Rangbah ka jylla u Conrad K Sangma bad kan leit ban thep kyrteng ha ka sngi Palei.
Ka seng Congress kan pynieng ia u Jingjang M. Marak, katba ka BJP kan pynieng ia u MDC ka GHADC na Tura u Bernard N Marak. Ka Kyrtong ka TMC kala ong, ba kan ym don kano kano ka jingktah ia ka jingpynieng kyrtong ka seng Congress ha ka elekshon bad ka jingiakhun kan long beit hapdeng jong ka TMC bad ka NPP, hynrei kiba bun na ki nongialam bad ki nongkitkam ka Congress kila wan ban pyniasoh bad ka TMC. Ka Sadhiarani kala ong ba palat ia ka 50% ha ka Gambegre kam don satia ia ki surok kiba biang bad ban kit ia kiba pang sha hospital ka long ka jingeh kaba khraw namar don ki por ba hap ban sei noh ia ki nongpang na ka kali kit nongpang ban shu rah noh da kaba iaid kjat ban poi sha hospital.
Ka jingpynlong ia ka elekshon shiteng samoi ha Gambegre, kadei namar ba u MLA ka Congress u Saleng A. Sangma ula iehnoh ia ka kam MLA hadien ba ula shah jied kum u Member of Parliament (MP) na Tura Constituency. Ia kane ka elekshon yn pynlong ha ka 13 tarik u Naiwieng bad ka jingniew vote kan long ha ka 23 tarik u Naiwieng.
